Ümumdünya Səhiyyə Təşkilatının (ÜST) yeni hesabatına görə, dünyada hər il 0–18 yaş arası təxminən 1,2 milyard uşaq fiziki şiddətə məruz qalır.
Teleqraf xəbər verir ki, 58 ölkənin statistik məlumatları əsasında aparılan araşdırmaya əsasən, son bir ay ərzində uşaqların 17%-i fiziki şiddətin ən ağır formaları ilə üzləşib.
Ən yüksək göstəricilər Qazaxıstan (30%), Ukrayna (32%), Serbiya (63%) və Toqo (77%) ölkələrində qeydə alınıb. Bu statistikaya əsasən, 2–14 yaş arası uşaqlar arasında fiziki zorakılıq xüsusilə yayılıb.
Fiziki şiddət təkcə ailə mühitində deyil, məktəblərdə də ciddi bir problem olaraq qalır. Araşdırmaya görə, Afrika və Mərkəzi Amerikada uşaqların təxminən 70%-i, Qərbi Sakit Okean regionunda isə təxminən 25%-i məktəb dövründə şiddətə məruz qalır.
ÜST-nin Sağlamlığın Müəyyənediciləri, Təşviqi və Qarşısının Alınması Departamentinin direktoru Etienne Krug məsələ ilə bağlı bildirib:
"Artıq fiziki şiddətin uşaqların sağlamlığı üçün ciddi risklər yaratdığı elmi şəkildə sübuta yetirilib. Bu cür zorakılıq onların davranışına, inkişafına və ümumi rifahına mənfi təsir göstərir. Üstəlik, bu nə valideynlərə, nə də cəmiyyətə fayda verir. Uşaqların həm evdə, həm də məktəbdə sağlam şəkildə inkişaf etməsi üçün onlara qarşı fiziki şiddətə tamamilə son qoymağın vaxtıdır".
