Fransanın nüvə sipərini digər Avropa ölkələrinə, o cümlədən Polşaya da şamil etmək təşəbbüsünü ciddi qəbul etmək olmaz.
Teleqraf xəbər verir ki, bu fikri Polşanın aparıcı müxalifət partiyası olan “Hüquq və Ədalət”in lideri Yaroslav Kaçinski səsləndirib.
Kaçinski "TVP Info" kanalında yayımlanan mətbuat konfransında deyib: “Nüvə zəmanətlərinə gəlincə, Fransanın nüvə qüvvələri Rusiya ilə müqayisədə çox kiçik və zəifdir”.
O xatırladıb ki, qardaşı Lex Kaçinski prezident olduğu dövrdə Parisdən oxşar təklif almışdı və bu, ciddi qarşılanmamışdı: “Qeyri-ciddi təklifləri ciddi qəbul etmək olmaz”.
Siyasətçinin sözlərinə görə, Paris bu təşəbbüslərlə yenidən böyük dövlət statusunu qazanmağa çalışır: “Fransa bu yolla mövqeyini gücləndirməyə və böyük dövlət obrazını bərpa etməyə çalışır, lakin müasir dünyada artıq təkbaşına belə statusa malik deyil. Bu cəhdlərin mənası yoxdur”.
Qeyd edək ki, mart ayında Polşanın Baş naziri Donald Tusk Varşavanın nüvə silahına çıxış imkanlarını araşdırdığını bildirmişdi.
