ABŞ Prezidenti Donald Tramp Ukraynada davam edən münaqişəni sülh yolu ilə həll etmək cəhdlərini davam etdirir, lakin onun ilkin yanaşması uğursuzluqla nəticələnib.
Bakupost.az xəbər verir ki, bu barədə Böyük Britaniyanın Rusiyadakı keçmiş səfiri Entoni Brenton TASS agentliyinə açıqlamasında bildirib.
“Onun prosesdən bezdiyinə dair heç bir dəlil görmürəm. Lakin onun Putin və Zelenski ilə bir araya gəlib həll yolu tapmaq kimi ilkin yanaşması, şübhəsiz ki, uğursuzluğa düçar olub”, - deyə diplomat vurğulayıb.
Brentonun sözlərinə görə, Tramp Kiyevdən atəşkəs ideyasına müəyyən dəstək gördüyünü düşünür və hesab edir ki, irəliləyişə nail olmaq üçün Rusiyaya təzyiq göstərilməlidir. Lakin bunun üçün hələlik effektiv vasitə tapılmayıb.
“Mən tərəqqinin tez əldə ediləcəyinə çox da optimist deyiləm”, - deyə keçmiş səfir əlavə edib.
O, Böyük Britaniyanın münaqişənin tez bir zamanda ədalətli və dayanıqlı həllində maraqlı olduğunu bildirib: "Bu həll həm Rusiyanın maraqları və təhlükəsizlik qayğıları, həm də Ukraynanın narahatlıqları nəzərə alınmaqla baş verməlidir".
Brentonun fikrincə, münaqişənin başa çatmasından sonra Avropa ölkələri bu prosesdə mühüm rol oynaya bilər və ABŞ-dən fərqli olaraq, Ukraynaya real təhlükəsizlik zəmanətləri verməyə daha çox hazır ola bilər.
