Silahlı qruplar susdurulsa, qəzzalıları kim qoruyacaq?
Zeynal Əmrəliyev: “Tony Bleyrin komissiyaya rəhbərliyi etiraz doğura bilər”
Biz ABŞ Prezidenti Donald Tramp tərəfindən təklif olunmuş Qəzza münaqişəsinə son qoymaq üçün Hərtərəfli Planının elan olunmasını alqışlayırıq.
Bu barədə Azərbaycan Xarici İşlər Nazirliyindən bildirilib.
Qeyd edilib ki, davamlı və ədalətli sülh səmimi öhdəlik, qarşılıqlı etimad və beynəlxalq hüquqa hörmət tələb edir.
“Məhbusların və girovların mübadiləsi, əhalinin humanitar ehtiyacların qarşılanması uzun müddətli sabitləşmə və siyasi həll yolunda etimadın qurulması və gərginliyin azaldılması üçün həyati əhəmiyyət kəsb edir.
Yalnız dialoq və xoş niyyət vasitəsilə, mərkəzində iki dövlətli həllin olduğu uzun müddətli razılaşmaya nail olmaq mümkündür”, - məlumatda vurğulanıb.
Politoloq Zeynal Əmrəliyev Sherg.az-a bildirib ki, Azərbaycan Xarici İşlər Nazirliyinin mövqeyi, sülhün əldə olunmasına dəstək kimi qiymətləndirilə bilər:
"Rəsmi Bakı həmişə Fələstin məsələsi ilə bağlı öz mövqeyini açıq şəkildə ifadə edib və bölgədə sülhün təmin olunmasına dəstəyini göstərib. Əgər təklif edilən plan, doğrudan da, Qəzza bölgəsinə sülh gətirəcəksə, Azərbaycan bunun qəbulundan yalnız məmnunluq hissi keçirər. Nazirliyin yaydığı açıqlamada da bu məqam öz əksini tapıb. Lakin əsas sual budur: Trampın təklif etdiyi plan həqiqətən bölgəyə davamlı sülh gətirə biləcəkmi? Burada söhbət beş illik idarəetmədən gedir, amma beş ildən sonra bölgədə hansı vəziyyətin yaranacağı qeyri-müəyyəndir.
Birinci növbədə həmin ərazidə sülh təmin olunmalıdır. Qəzzada kifayət qədər silahlı qruplar mövcuddur və onların silahsızlaşdırılması məsələsi gündəmdədir. Ancaq bu qruplar silahsızlaşdırıldıqdan sonra bölgədə yaşayan sadə insanları İsrail qarşısında kim qoruyacaq? Çünki İsrail müntəzəm olaraq Qəzza ərazisində əməliyyatlar həyata keçirir. Heç kim təminat vermir ki, sabah bölgədə kiçik bir silahlı insident baş verəcəyi halda İsrail yenidən hərbi əməliyyatlara başlamayacaq. Bu baxımdan, beş ildən sonrakı Qəzzanın taleyi qeyri-müəyyən qalır. Trampın əvvəlki planında hətta belə bir məqam vardı: Qəzzada yaşayan əhalini tamamilə köçürmək, ərazidə yeni yaşayış məntəqələri salmaq və bu bölgəni faktiki olaraq İsrailə ilhaq etmək. Bu yanaşma isə ciddi narahatlıq doğurur".
Analitik əlavə edib ki, Fələstin tərəfini narahat edən başqa bir məsələ də Böyük Britaniyanın keçmiş baş naziri Tony Bleyrin həmin komissiyaya rəhbər kimi təyin olunması ehtimalıdır:
"Çünki Bleyrin adı Yaxın Şərqdə mənfi mənada çəkilir. O, İraq müharibəsini başladan və ABŞ-nin sabiq prezidenti Corc Buşla birlikdə bu əməliyyata dəstək verən əsas fiqurlardan biridir. Bundan əlavə, onun İsrailə yaxın mövqeyi də məlumdur. Belə bir şəxsin Qəzza ilə bağlı komissiyaya rəhbərlik etməsi ciddi suallar və etirazlar doğurur".
