“Gürcüstan NATO-ya üzvlük niyyətindən imtina etmir”.
Teleqraf-ın yerli bürosu xəbər verir ki, bunu ölkənin xarici işlər naziri Maka Boçorişvili “İmedi” telekanalına müsahibəsində deyib.
Onun sözlərinə görə, bu niyyət Rusiyanın neqativ mövqeyi və alyansın şərqə doğru genişlənməsindən mümkün imtinanın müzakirəsinə baxmayaraq, dəyişməz olaraq qalır.
“Gürcüstan alyansın üzvü olmağı arzulayır və artıq xeyli müddətdir təhlükəsizlik çətirini orada görür. Məhz buna görə biz bu məsələni konstitusiyada təsbit etmişik”, - M.Boçorişvili söyləyib.
XİN başçısı qeyd edib ki, bu məqsədin reallaşması yalnız Tbilisidən deyil, NATO-ya üzv ölkələrin siyasi iradəsindən də asılıdır:
“NATO-ya yalnız öz iradəmizlə daxil ola bilsəydik, alyansa 2008-ci ildə, bəlkə də daha tez üzv olardıq”.
Qeyd edək ki, 2008-ci ildə NATO-nun Buxarest sammitindən sonra Gürcüstan və Ukrayna gələcək üzvlük haqqında siyasi vəd alsalar da, alyansa daxil olmaqla bağlı konkret müddət və fəaliyyət planı hələ də təqdim edilməyib.
