Tam (11 illik) orta təhsil səviyyəsi üzrə martın 3-də keçirilmiş buraxılış imtahanının nəticələri elan olunub.
Dövlət İmtahan Mərkəzindən (DİM) Redaktor.az-a verilən məlumata görə, bu imtahanlarda iştirakı nəzərdə tutulan 52267 nəfərdən 474 nəfər imtahana gəlməyib. imtahan qaydalarını pozduğu üçün 16 nəfərin nəticəsi ləğv olunub.
İmtahan iştirakçıları arasında 14 nəfər 300 bal toplamaqla ən yüksək nəticəni göstərib.
Maraqlıdır, nəticələrin yüksək olması sualların asan olmasındanmı xəbər verir? Bu il balların yükəlmə ehtimalı var?
Məsələ ilə bağlı danışan təhsil eksperti Elçin Əfəndi "Sherg.az"a bildirib ki, apellyasiya komisiyasına edilən şikayyətlərlə birgə yüksək nəticə əldə edənlərin sayının artacağı gözlənilir:
"Bu il abituriyentlərin yüksək bal toplamasının səbəbi təkcə sualların asan olmasından qaynaqlanmır, onlar əvvəlkilərdən fərqli olaraq daha hazırlıqlı idilər. Çünki pandemiya, karantin dövrünün çətinliklərini bir o qədər hiss etmədilər. Xüsusi ilə iki ildə distand və hibrid təhsildən deyil, ənənəvi metoddan yararlandılar. Şübhəsiz ki, bu nəticələrə öz müsbət təsirini göstərdi. Əlavə olaraq, abituriyentlər artıq kurikulumla keçirilən imtahanlara adaptasiya olublar. Əvvəllər açıq sualları cavablamaqda çətinlik çəkirdilərsə, indi bu sualları asanlıqla düzgün yazırlar. Həmçinin, ötən ildən fərqli olaraq bu il imtahana salınan suallar daha əlverişlidir. Hazırlıqlı olanlar da bu fürsətdən maksimum yararlandılar. Ümumilikdə bu il nəticələr yüksək olacaq və əvvəlcədən bununla bağlı proqnoz verilmişdi. Təbii ki, yüksək nəticələr keçid ballarına təsir göstərəcək və ballar qalxacaq. Xüsusi ilə kolleclərdə və 5-ci qrupdakı ixtisasların balı artacaq".
