Azərbaycan Milli Elmlər Akademiyasının müxbir üzvü, sabiq təhsil naziri Misir Mərdanov kulis.az saytına verdiyi müsahibədə elmin milli olmadığını deyib. O, AMEA-nın adını Rusiyadakı Elmlər Akademiyasının adı il müqayisə edərək bildirib ki, burada “milli” sözünə ehtiyac yoxdur.
Məsələ ilə bağlı Serq.az-a danışan təhsil eksperti Kamran Əsədovun fikrincə, AMEA-da “milli” sözünün işlənməsi qüsur deyil:
“N ational academy” (red: “Milli akademiya”) statusu dünyanın bütün ölkələrində mövcuddur. Doğrudur, riyaziyyat, fizika kimi ümumbəşəri elm sahələri var. Amma nəzərə almaq lazımdır ki, hər ölkədə elmin öz inkişaf tendensiyaları var.
Məsələn istənilən ölkənin təhsil sistemində tarix, ədəbiyyat, dil kimi elm sahələri milli dəyərlərə söykənir. Ona görə “Azərbaycan tarixi”, “Azərbaycan ədəbiyyatı”, “Azərbaycan dili” deyirik. İkinci bir tərəfdən isə nəzərə almaq lazımdır ki, AMEA təkcə beynəlxalq əhəmiyyətli yox, həm də yerli əhəmniyyətli işlər görür. Milli kadrların yetişməsi, milli maraqların hər şeydən üstün tutulması akademiyanın əsas vəzifələrindən biridir. Odur ki, “milli” sözünün əleyhinə deyiləm. Həmçinin bütün elmləri beynəlmiləl hesab etmək olmaz”.
