Hollandiyada aparılan bir araşdırma, ağıllı saatların stress səviyyəsini dəqiq müəyyən edə bilmədiyini üzə çıxarıb.
Sherg.az xəbər verir ki, Hollandiyanın Leiden Universitetində aparılan tədqiqat çərçivəsində 3 ay ərzində 800 gənc yetkin “Garmin Vivosmart 4” model ağıllı saatlarla izlənilib.
İştirakçılardan gündə 4 dəfə stress, yorğunluq və yuxu vəziyyətlərini bildirmələri istənilib.
Nəticədə, saatların ölçdüyü stress səviyyəsi ilə iştirakçıların öz bəyanları arasında “demək olar ki, sıfır” səviyyəsində əlaqə olduğu müəyyən edilib. Hətta iştirakçıların dörddə biri üçün ağıllı saatlar, onların stressli və ya stressiz olduqlarını bildirdikləri vaxtın tam əksini göstərib.
Araşdırmada yorğunluq ölçmələrinin stress ölçmələrinə nisbətən bir qədər daha dəqiq olduğu, yuxu müddətinin isə iştirakçıların istirahət hissi ilə daha güclü əlaqə göstərdiyi aşkar edilib.
Lakin yuxu məlumatlarının yalnız yuxunun müddətini əks etdirdiyi, yuxu keyfiyyəti barədə birbaşa məlumat vermədiyi vurğulanıb.
Klinik Psixologiya Bölməsindən dosent Eiko Fried açıqlamasında deyib:
“Ürək döyüntüsü sürətinin ölçülməsi emosional vəziyyəti müəyyən etmək üçün kifayət deyil. Ürək döyüntünüz, yalnız narahatlıqdan deyil, xoşbəxtlik və ya həyəcan səbəbindən də arta bilər.”
Fried, tədqiqat nəticələrinin geyinilə bilən cihazların zehni vəziyyətlə bağlı verdiyi məlumatlara dair mühüm suallar doğurduğunu bildirərək xəbərdarlıq edib:
“Ehtiyatlı olun və həyatınızı ağıllı saatınıza görə planlaşdırmayın. Bunlar tibbi cihaz deyil, istehlak məhsullarıdır.”
Araşdırma "Journal of Psychopathology and Clinical Science" jurnalında dərc olunub.
