Çində istehsal olunan yeni insanabənzər robot, tək bir “robotik beyin”lə bir neçə fərqli robot formasına uyğunlaşa biləcək.
Sherg.az xəbər verir ki, Çinli tədqiqatçılar, bir neçə funksiyanı eyni anda yerinə yetirə biləcəyini bildirdikləri “tək beyin - çoxlu forma” konseptinə malik insanabənzər robotu təqdim ediblər.
"Global Times" qəzetinin xəbərinə görə, Çinin Anhui əyalətinin Həfey şəhərində Youibot Robotics şirkəti ilə Si’an Jiaotong Universitetinin birgə layihəsi nəticəsində “Lin Şu” adlı insanabənzər robot istehsal edilib.
Tədqiqatçılar bildiriblər ki, robot tək bir “robotik beyin” vasitəsilə bir neçə fərqli robot formasına uyğunlaşa bilir və bu xüsusiyyət sayəsində müxtəlif şəraitlərə adaptasiya oluna biləcək şəkildə - “tək beyin–çoxlu forma” konseptinə uyğun hazırlanıb.
Robotun 1,66 metr hündürlüyündə və 40 kiloqram ağırlığında olduğunu qeyd edən mütəxəssislər, Lin Şunun çoxşaxəli hərəkət qabiliyyətinə malik olduğunu və mürəkkəb ərazi şəraitinə uyğunlaşa bildiyini vurğulayıblar.
Onlar əlavə ediblər ki, robot məsələn, bir e-ticarət anbarında bir əli ilə rəfdən paket götürərkən, digər əli ilə skaner tuta bilər.
Youibot Robotics şirkətinin qurucusu Can Çahui “Science and Technology Daily” qəzetinə açıqlamasında, Lin Şunun eyni anda bir neçə tapşırığı yerinə yetirməli olan sənaye robotları üçün həll yolu təqdim etdiyini bildirib.
