Tesla, şirkətin baş direktoru (CEO) olan Elon Maska təxminən 29 milyard dollar dəyərində 96 milyon səhm təqdim edib.
Sherg.az xəbər verir ki, 2024-cü ildə Delaver ştatındakı bir məhkəmə, Tesla rəhbərliyinin təsdiq prosesindəki qüsurlar və səhmdarlara qarşı ədalətsizlik səbəbilə Maskın 2018-ci ildəki 50 milyard dollardan artıq dəyəri olan təzminat paketini ləğv etmişdi.
Mask mart ayında bu qərara qarşı apellyasiya şikayəti verərək, aşağı instansiya hakimlərinin rekord təzminatı ləğv edərkən bir neçə hüquqi səhv etdiyini iddia etmişdi.
Bu ilin əvvəlində elektrikli avtomobil istehsalçısı Tesla, şirkət rəhbərliyinin Muskla bağlı bəzi təzminat məsələlərini nəzərdən keçirmək üçün xüsusi komitə yaratdığını açıqlamış, lakin detalları paylaşmamışdı.
Teslanın 13 faizlik səhm payı ilə ən böyük səhmdarı olan Mask, diqqətini sərfəli qiymətə elektrikli avtomobil layihələrindən robotaksilərə və insanabənzər robotlara yönəldərək, şirkəti sadəcə avtomobil istehsalçısı deyil, süni intellekt və robot texnologiyası firması kimi mövqeləndirməkdədir.
Xüsusi komitənin müraciətində deyilir: “Elonun digər biznes təşəbbüslərinin, maraqlarının və vaxtına yönəlmiş potensial tələblərin fərqindəyik. Amma bu bonusun onun Teslada qalmasını təşviq edəcəyindən əminik.”
Bonus paketinin, Maskın səsvermə gücünü mərhələli şəkildə artıracaq formada dizayn edildiyi və onun Teslanın missiyasına fokuslanmasını təmin etməyin səhmdarların əsas prioriteti olduğu bildirilib.
Tesla səhmləri, bazaröncəsi ticarətdə 2 faizdən çox dəyər qazanıb.
