“Süni intellekt geniş imkanlarla yanaşı, ciddi risklər də yaradır”.
Bunu AMEA-nın vitse-prezidenti, Azərbaycan İnformasiya Texnologiyaları İnstitutunun baş direktoru Rasim Əliquliyev Elm və Təhsil Nazirliyinin İdarəetmə Sistemləri İnstitutunda keçirilən “Kibernetika və informatikanın problemləri” (PCI 2025) VI beynəlxalq konfransında çıxışında deyib.
Rasim Əliquliyev bildirib ki, son illərdə ortaya çıxan yeni texnologiyalar dördüncü sənaye inqilabının əsasını qoyub. Lakin ölkəmizdə süni intellektin tarixi və inkişaf mərhələləri ilə bağlı kifayət qədər məlumat mövcud deyil:
“Bu sahədə zəruri bilgilərin toplanması və ictimaiyyətə çatdırılması vacibdir”.
O, gənclərin süni intellekt və müasir informasiya texnologiyaları ilə bağlı daha dolğun biliklər əldə etməsinin önəmini vurğulayıb:
“Gənclərə anlatmalıyıq ki, istifadə etdiyimiz texnologiyalar birdən-birə yaranmayıb, onların uzun bir inkişaf tarixi var. Mən məsuliyyətlə deyirəm ki, bu istiqamətdə hələ görüləsi çox işlərimiz var. İnformasiya texnologiyaları və İdarəetmə Sistemləri ilə bağlı Azərbaycan alimlərinin son 60 ildə apardığı araşdırmaları sistemləşdirərək cəmiyyətə təqdim etməliyik”.
İnformasiya texnologiyaları üzrə mütəxəssis Elvin Həsənov “Sherg.az”a bildirib ki, süni intellekt haqqında danışanda biz həm böyük imkanları, həm də riskləri nəzərə almalıyıq:
“Bir tərəfdən, bu texnologiya bir çox işləri asanlaşdırır, insanlar üçün vaxt qazandırır, təhsildə fərdi yanaşma yaradır, elmdə isə böyük məlumatların analizini sürətləndirir. Digər tərəfdən, bəzi peşələr artıq süni intellekt tərəfindən əvəz olunmağa başlayır. Bu da əmək bazarında yeni bacarıqlara tələbi artırır. Kibertəhlükəsizlik baxımından da süni intellekt həm fürsət, həm də təhlükədir. O, hücumları daha da mürəkkəbləşdirə, real görsənən saxta videolar və mesajlar hazırlaya bilər. Bu, insanları aldatmaq riskini çoxaldır. Bunun qarşısını almaq üçün həm dövlət, həm də şirkətlər süni intellektdən istifadəyə dair qaydalar hazırlamalı, təhlükəsizlik sistemlərini gücləndirməli, vətəndaşlar isə daha diqqətli olmalıdır. Təhsil və elm sahəsində isə süni intellekt böyük üstünlüklər gətirir. Belə ki, hər bir tələbəyə fərdi yanaşma imkanı verir, müəllimlərin iş yükünü azaldır, elmdə yeni kəşfləri sürətləndirir. Ən əsası isə süni intellekt bizə göstərir ki, gələcəkdə uğurlu olmaq üçün daim öyrənməli və yeni texnologiyalara uyğunlaşmalıyıq”.
