Amerikalı iş adamı İlon Mask Azərbaycanla bağlı paylaşım edib.
"APA-Economics" xəbər verir ki, o, ölkəmiz barədə öz "X" sosial şəbəkə hesabında yazıb.
"X" artıq Azərbaycanda bir nömrəli xəbər tətbiqidir. "X" bir-bir ölkələri fəth edir", - o qeyd edib.
İnformasiya texnologiyaları üzrə mütəxəssis Elvin Həsənov “Sherg.az”a bildirib ki, doğrudan da son aylarda “X” yəni keçmiş “Twitter” Azərbaycanda xüsusilə xəbərlərin paylaşılması və ictimai mövzuların müzakirəsi baxımından daha aktiv istifadə olunmağa başlayıb:
“Lakin ümumilikdə götürdükdə, ölkəmizdə hələ də ən geniş istifadə olunan sosial şəbəkələr sırasında Instagram, WhatsApp, Facebook və TikTok öndə gəlir. Bu platformalar daha çox vizual məzmun, şəxsi əlaqə və əyləncə məqsədilə seçilir. “X” platformasının üstünlüklərindən biri odur ki, burada xəbərlər çox sürətli yayılır və ictimai məsələlərlə bağlı açıq müzakirə mühiti formalaşır. Bu platforma xüsusilə jurnalistlər, dövlət qurumları və İT mütəxəssisləri üçün vacib bir alətə çevrilib. Məsələn, operativ açıqlamalar, rəsmi məlumatlar və beynəlxalq mövzularda ilk məlumatlar bəzən məhz bu platformada görünür. Ancaq mənfi tərəfləri də var. Məsələn, “X” platformasında yayılan məlumatların bəzən dəqiqləşdirilməmiş, yoxlanmamış olması feyk xəbərlərin yayılmasına səbəb ola bilər. Bəzən istifadəçilər bu məlumatların doğruluğunu araşdırmadan paylaşır, bu da dezinformasiyanın yayılmasına səbəb olur. Eyni zamanda, platformada neqativ və aqressiv ritorika halları da müşahidə olunur. Ümumiyyətlə hər hansısa bir sosial şəbəkədən asılı olmayaraq, istifadəçilər təhlükəsizlik və məlumat doğruluğu məsələsində diqqətli olmalıdırlar. Çünki şəxsi məlumatların paylaşılması, şübhəli keçidlərə kliklənməsi və ya emosional paylaşımların yayılması hallarına görə insanlar informasiya ayıqlığı baxımından diqqətli olmalıdırlar”.
