Dövlət və özəl sektorun məlumatları hədəfdədir
Azərbaycana qarşı genişmiqyaslı kiber təhdid riski müşahidə olunur və görünür ki, bu dəfə ölkəmizə qarşı həyata keçiriləcək hücumlar hərtərəfli olacaq. Xarici qüvvələrin bunun üçün əhəmiyyətli maliyyə resursları ayırdığı müşahidə edilir. Bu barədə Azərbaycan İnformasiya və Kommunikasiya
Texnologiyaları Sənayesi Assosiasiyasının sədri Elvin Abbasov Sherg.az-a açıqlamasında bildirib.
Hazırda Azərbaycan teleqram seqmentinə kütləvi fişinq hücumlarının həyata keçirildiyini vurğulayan E.Abbasov qeyd edib ki, paralel olaraq, "DarkNet" forumlarında Azərbaycan dövlət qurumlarından sızan məlumatları əldə etmək istəyən şəxslər elanlar yerləşdirir:
“Kiber təhlükəsizlik sahəsində son günlər müşahidə olunan tendensiya göstərir ki, Azərbaycan vətəndaşlarına və təşkilatlarına aid məlumatlar yalnız sızma baş verdiyi anda deyil, həm də sızmadan sonra "DarkNet" və “leakdata store” forumlarında açıq şəkildə satışa çıxarılır.
Yuxarıdakı ekran görüntülərində göründüyü kimi, Leakbase[.]la kimi forumlarda “Azerbaijan Database Buyer” (Azərbaycan bazasına alıcı) başlığı altında elanlar yerləşdirilib. Bu elanlarda “Azərbaycan üzrə istənilən verilənlər bazasını alıram” kimi ifadələrdən istifadə olunur. Bu, iki əsas təhlükəni göstərir. Tələb və təklif bazarı formalaşıb. Kibercinayətkarlar Azərbaycan bazarına xüsusi maraq göstərir, çünki bu məlumatlar maliyyə fırıldaqlarında və ya sosial mühəndislik hücumlarında istifadə oluna bilər. Digər təhlükə isə məlumatların alqı-satqısının açıq şəkildə aparılmasıdır. Forumlarda şəxslər teleqram üzərindən əlaqə kanalları paylaşır ki, bu da satışın real və davamlı olduğunu göstərir”.
Təhlükənin əsas mənbələrinə gəldikdə isə ekspert qeyd edib ki, bu mənbələr dövlət qurumları, banklar, telekommunikasiya şirkətləri və özəl təşkilatların məlumatları, müştəri və vətəndaş məlumatları, korporativ hesablardır.
