“Qlobal səviyyədə milyonlarla dollar dövr edir”
ABŞ-ın Northwestern Universitetinin tədqiqatçıları elmi nəşrlərdə saxta məqalələr yayımlayan beynəlxalq bir saxta şəbəkəni aşkara çıxarıb.
Sherg.az xəbər verir ki, araşdırmaya görə, bu şəbəkə elmi nəşrlərin etibarlılığını sistemli şəkildə sarsıdır.
PNAS jurnalında dərc olunan tədqiqat, saxta elmi məqalələrin sayının orijinal araşdırmalardan daha sürətlə artdığını göstərib. Bu sistemdə “məqalə fabrikləri”, vasitəçilər və saxta redaktorlar yer alır, pulla həm məqalə, həm də istinad almaq mümkündür.
Alimlər həmçinin bəzi jurnal adlarının oğurlandığını və sahə ilə əlaqəsi olmayan minlərlə saxta məqalənin yayımlandığını da bildiriblər. Bu prosesə milyonlarla dollar sərf olunduğu vurğulanır.
Mütəxəssislər redaktə proseslərinin gücləndirilməsini, saxtakarlıqların aşkarlanması üçün yeni metodların tətbiqini və stimullaşdırma sisteminin yenidən qurulmasını təklif edirlər.
Əgər tədbir görülməzsə, saxta elmi məqalələr yalnız akademiyanı deyil, cəmiyyətin elmə olan inamını da zədələyə bilər.
