İrəvan sərhəddə baş verən atəşkəsin pozulma hallarının qarşısını almasa, rəsmi Bakı adekvat cavab verməli olacaq
"Son günlər Azərbaycan-Ermənistan sərhədində və Qarabağda atəşkəsin mütəmadi pozulmasında başlıca günahkar seçkilərdə məğlub olan Robert Koçaryan və onun "Qarabağ klanı"dır". Bu sözləri Vətəndaş Həmrəyliyi Partiyasının sədr müavini Samir Əsədli deyib. Partiya təmsilçisi qeyd edib ki, heç kəsə sirr deyil ki, bu gün Ermənistan silahlı qüvvələri daxilində "Qarabağ klanı"na məxsus zabit və əsgərlər var: "Atəşkəsin pozulma halları "Qarabağ klanı"na sadiq hərbiçilərin ordu daxilində özfəaliyyəti ilə əlaqədardır. Nikol Paşinyan indiki halda hakimiyyətini möhkəmləndirmək və sülhə nail olmaq istəyirsə, "Qarabağ klanı"nın nümayəndələrinə qarşı sərt tədbirlər görməli, beləcə həm də Robert Koçaryanın gücünü sındırmalıdır. Rəsmi Bakı bir müddət öz səssizliyini qorusa da, gec-tez Ermənistan silahlı qüvvələrinin dövlət sərhədində atəşkəsi pozma hallarının qarşısını almaq üçün ciddi addımlar atmalı olacaq. 44 günlük müharibə bir daha onu göstərdi ki, Ermənistan Azərbaycanla müharibə ritorikasında danışa bilməz".
S.Əsədli vurğulayıb ki, müharibə bitsə də, Azərbaycan Ordusu döyüşə tam hazır vəziyyətdədir: "Rəsmi İrəvan sərhəddə baş verən atəşkəsin pozulma hallarının qarşısını almasa, rəsmi Bakı adekvat cavab verməli olacaq. O ki qaldı Ruben Vardanyana, onun Rusiyanın hakim elitası ilə sıx əlaqələrinin olduğu faktdır. Və versiya kimi onun Qarabağa gəlişinin Kremlin regionda nüfuz dairəsi üçün qura biləcəyi yeni mürəkkəb oyunun ilk carçısı ola biləcəyi idi. Amma Ruben Vardanyanın bu zaman hansı funksiyaları yerinə yetirəcəyi və bölgədəki hadisələrin gedişatına hansı təsiri göstərə bilməsi sual doğurur. Digər tərəfdən Ruben Vardanyanın mümkün kuratorlarının bu işdən hansı qazanc əldə edəcəkləri də dumanlıdır".
