Qərbin "b" planı işə düşür
Qərb bütün maraqlarını seçki, demokratiya adı altında həyata keçirir
Qərb bütün maraqlarını seçki, demokratiya adı altında həyata keçirir
Bəzi Qərb siyasətçiləri Ukrayna hələ də Rusiya ilə müharibə vəziyyətində olsa da, onu növbəti prezident seçkiləri keçirməyə çağırır. Bu barədə “Washington Post” yazıb. Nəşr xatırladıb ki, Kiyevə ilk belə müraciətlə Niderlandı təmsil edən Avropa Şurası Parlament Assambleyasının rəhbəri Tini Koks olub. Oxşar fikri nüfuzlu amerikalı respublikaçı senator Lindsi Qrem də Kiyevə səfəri zamanı dilə gətirib. Amerika siyasətinin mühafizəkar qanadının digər nümayəndələri, o cümlədən aparıcı Taker Karlson Ukraynada seçkilərin keçirilməsini təklif ediblər. Ukrayna konstitusiyasına görə, ölkə hakimiyyətinin nümayəndələri dəfələrlə bəyan etdikləri kimi, hərbi vəziyyət dövründə seçkilər keçirilə bilməz. Ukraynada növbəti prezident seçkiləri 2024-cü il martın 31-dən gec olmayaraq keçirilməlidir.
Lakin mövcud qanunlara görə, əgər o vaxta qədər ölkədə hərbi vəziyyət olarsa, seçkilər keçirilə bilməz. Bu o deməkdir ki, səsvermənin keçirilməsi üçün ya ölkə konstitusiyasına dəyişiklik edilməlidir, ya da hərbi vəziyyət müvəqqəti olaraq ləğv edilməlidir. Ukrayna rəsmiləri, eləcə də “Washington Post” qəzetinə müsahibə verən seçki ekspertləri razılaşırlar ki, müharibə zamanı azad və ədalətli seçkilərin keçirilməsi, demək olar ki, mümkün deyil. Qəzet xatırladır ki, Ukrayna ərazisinin təxminən beşdə biri Rusiyanın işğalı altındadır və ölkənin milyonlarla sakini evlərini tərk etməyə və ya xaricə getməyə məcbur olub. Cəbhədə on minlərlə hərbi qulluqçu da var. Rusiya Ukraynanı daxildən zəiflətmək üçün vəziyyətdən istifadə edə bilər. Xüsusilə Ukrayna cəmiyyətində və siyasətçilər arasında parçalanmaları artırmağa çalışa bilərlər.
Politoloq Tural İrfan "Sherg.az"a açıqlamasında bildirib ki, Qərbin bəzi dairələri Ukrayna-Rusiya məsələsində fikir ayrılığına düşürlər. Zənn edirlər ki, Prezident V.Zelenski Qərbin maraqlarını icra etməkdə uğursuz liderdir. Habelə savaşın ikinci əsas mərhələsi üçün lazım deyil:
"Bununla yanaşı, Zelenskinin bəzi məsələlərdə müstəqil siyasət yürütməsi, Qərbin maraqları ilə uzlaşmayan tərzdə siyasət aparması onları narahat edir. Bəzi ölkələr Ukraynaya son zamanlar silah verməyi də dayandırmağı düşünür. Çünki savaş uzanır, nəticə də demək olar ki, yoxdur. Seçkilərin keçirilməsi Ukraynaya yox, Qərbə lazımdır. Zənnimcə, məsələyə obyektiv yanaşsaq seçkiyə lüzum yoxdur və bu, şübhəsiz ki, Zelenski hökumətini laxlatmağa hesablanmış məsələdir.
Qərb düşünür ki, nisbətən loyal görüntülü şəxsi gətirmək lazımdır və Rusiya ilə məsələləri nisbətən siyasi müstəviyə daşımaq mümkün olsun ki, bəlkə nəyəsə nail olunsun. Zelenski ilə bu dönüşü etmək qeyri-ciddi alınar. Bəlkə də heç alınmaz. Zelenski siyasətində tam dönüş edəcək şəxs deyil. Hər bir halda Ukrayna liderinin bu posta siyasətdən gəlməməsi, müəyyən təcrübəsinin qaneedici görünməməsi Qərbin ümidlərini tam doğrultmadı. Ola bilsin, daha hazırlıqlı namizəd hazırlayıblar. Qərb bütün maraqlarını seçki, demokratiya adı altında həyata keçirir. Nəticə olaraq deyə bilərik ki, Qərbin Ukrayna-Rusiya məsələsinin növbəti mərhələsi üçün növbəti "b" planı var. Seçki mövzusunun ortaya atılması da onu göstərir ki, bu planın tərkibində Zelenski yoxdur".
