"Son günlər davam edən gərginlik və dövlətimizə qarşı törədilən terror aktları Azərbaycanın ərazi bötövlüyünü təmin etmək istiqamətində atdığı qətiyyətli addımlara qarşı təzyiq vasitəsidir".
Bunu Vəhdət Partiyasının sədr müavini Vasif Əfəndiyev "Sherg.az"a açıqlamasında deyib.
Partiya rəsmisi deyib ki, hər dəfə Azərbaycan Ordusu Qarabağ iqtisadi rayonu ərazisində xarici qüvvələrin təşkil etdiyi təxribatların qarşısını aldıqda Fransa, İran və Rusiya öz narahatlıqlarını açıq ifadə edirlər:
"Fransa və Rusiya bəyanat vasitəsilə münasibət bildirsə də, İran həm də əməldə ölkəmizdə sabitliyi pozmaq istiqamətində hərəkətə keçir. İndiyə qədər baş vermiş təxribat və terror hadisələrini sadalamayacam, çünki, ictimaiyyətə bütün çılpaqlığı ilə məlumdur. Fazil Mustafaya qarşı törədilən terror hadisəsi əslində onun şəxsində dövlətçiliyimizə edilən hücumdur. Vəhdət Partiyasının sədri Tahir Kərimli terror hadisəsinə münasibət bildirəndən dərhal sonra sosial şəbəkələri izləyən terror qruplaşmasının üzvlərindən növbəti təhdid gəldi. “Tahir Kərmli, növbəti hədəf sənsən “mesajı verildi. Bu sayaq təhdidlər ilk dəfə deyil və dəfələrlə olub. Gizlətmirəm ki, mənə qarşı da eyni davranışlar olub. Hətta Fazil Mustafa ilə bənzər formada şəkillərimizi eyni zibil qutusunun üzərinə yapışdırıb sosial şəbəkələr də paylaşmışdılar".
V.Əfəndiyev vurğulayıb ki, milli dövlətçiliyimizə sadiq olan ictimai-siyasi xadimlərin terror qrupları tərəfindən hədəf alınması çox pis haldır:
"Dövlətin öz vətəndaşlarını qorumaq üçün mexanizmi olmalıdır. Hər siyasi fəala mühafizəçi təyin etmək və ya silah vermək real olmasa da, partiya sədrlərinin mühafizəsi təşkil edilməlidir. Şəhər və rayon İcra hakimiyyətlərinin başçılarının mühafizə olunduğunu bildiyim üçün ölkədə tanınmış və fəaliyyəti səbəbindən terrora məruz qalma ehtimalı olan partiya sədrlərinin qorunmasının təmin edilməsi də zəruridir".
Qeyd edək ki, Milli Məclisin deputatı, Böyük Quruluş Partiyasının sədri Fazil Mustafaya sui-qəsdlə bağlı "pravda.az"a danışan millət vəkili, Vəhdət Partiyasının sədri Tahir Kərimli özü barədə diqqətçəkən açıqlamalar verib. Deputat vurğulayıb ki, o da təhdidlərlə üzləşib, hədələrə məruz qalıb.
