“Hesab edirəm ki heç bir müstəqil dövlət bu kimi hallara tab gətirməz.Biz də bu qanunsuzluqlara dözməyib, tədbirlərimizi görəcəyik”
Son zamanlarda erməni separatçıların azğınlığı daha da şiddətlənib.Dünən Şuşa rayonunun Kiçik Qaladərəsi kəndində, Azərbaycanın Qarabağ bölgəsində Rusiya sülhməramlılarının müvəqqəti dislokasiya zonasında ermənilər Azərbaycana məxsus yük avtomobilinin hərəkətinə maneə yaradıblar.
Məsələyə Rusiya sülhməramlıları da müdaxilə edib.
Hadisənin necə bitdiyi məlum deyil.
Vəziyyəti dəyərləndirən millət vəkili Elman Məmmədov "Sherg.az"a bildirib ki, Azərbaycan ciddi addımlar atacaq. Parlamentarinin sözlərinə görə, bu hadisələr erməni silahlı qüvvələrinin tör-töküntüləri və terrorçu qurum olan "Arsax"ın işidir:
"Bütün bunlar Azərbaycan ərazisində müvəqqəti yerləşmiş Rusiyaya məxsus hərbi kontingentin gözləri önündə baş verir. Lakin onlar heç bir sərt reaksiya vermirlər və cinayətkarlar üçün şərait yaradırlar.
Təəsüflər olsun ki, özlərini sülhməramlı kimi qələmə verən rus birləşməsi erməni terrorçuların himayəsi ilə məşğuldur və Azərbaycan respublikasının qanunlarını pozur.
Hesab edirəm ki heç bir müstəqil dövlət bu kimi hallara tab gətirməz.Biz də bu qanunsuzluqlara dözməyib, tədbirlərimizi görəcəyik. Belə halların qarşısını almaq üçün ərazimizdəki təxribatçıların kökünü kəsməliyik”.
Nihat Müzəffər
