Azərbaycanda İranın casus şəbəkəsinə qarşı əməliyyatlar davam edir.
“MOUZE” “Telegram” kanalının məlumatına görə, İranın molla rejiminə xidmət edən daha bir neçə nəfər saxlanılıb.
Onlar “Müsəlman Birliyi Hərəkatı”nın üzvü Fədail Şükürov, Şəmkir sakinləri - Yavər İsmayılzadə, Anar Şöhləyev, Vüsal və İlyas adlı şəxslərdir.
Həmçinin Qeyd edək ki, dünən həyata keçirilən əməliyyat tədbirləri nəticəsində üç iranpərəst dindar saxlanılıb.
Onlar - Şeyx İmran Ələsgərov, Alik Aslanov və Nicat Ağayevdir.
Hadisəni "Sherg.az"a dəyərləndirən siyasi şərhçi Turab Rzayev vurğulayıb ki, İranla Azərbaycan arasında siyasi gərginlik davam etdikcə bu cür əməliyyatların sayı artacaq:
"Çünki cənub qonşumuz bizi açıq şəkildə təhdid edir. Bu günlərdə Azərbaycan sərhəddinin sıfır bölgəsində uçuşlar keçirməsi və sərhədlərin dəyişməsi bizim qırmızı xəttimizdir deməsi bunun bariz nümunəsidir. Həmçinin İran Müdafiə Nazirliyinin nümayəndəsi Azərbaycanı sionist yuvası adlandırıb. Hətta Azərbaycan XİN-i və Müdafiə nazirliyi bu hadisələrlə bağlı bəyanat da verib. Ona görə ki, bu açıqlamalar Azərbaycan-İran əlaqələrinə zərbə vurur. Cənub qonşumuzun bizə qarşı həm xaricdən, həm də daxildən təxribatlar hazırlayır. Daxildəki təxribatların qarşısını almaq üçün isə hüquq mühafizə orqanlarının bu cür əməliyyatları daha da sürətləndirəcəyini düşünürəm. Yəni İranla bağlantılı olan, daxildə təxribat törədə biləcək silahlı və ya silahsız şəxslər zərərsizləşdirilir. Bunu təbii qəbul etmək lazımdır. Ümumiyyətlə əməliyyatlar həm kəmiyyət, həm miqyas, həm də keyfiyyət baxımdan artacaq. Hətta DTX-nın daha dərin qatlara nüfuz edərək İran təsir agentlərinin hədəfə alınması da gözləniləndir.Eyni zamanda bu əməliyyatların Azərbaycan və İran arasındakı münasibətlərin xarakterindən asılı olaraq dəyişəcəyini də ehtimal edirəm. Çünki əgər cənub qonşumuzun həqiqətən də təxribatlara son qoyarsa və Ermənistan-Azərbaycan arasındakı sərhəd münaqişəsində erməniləri dəstəkləməyə davam etməyərək ikili münasibətlərin normallaşmasında səmimi olarsa bu cür əməliyyatların kəmiyyəti azalacaq. Yox əgər onlar bizə qarşı olan düşmən tutumunu artan sürətlə davam etdirəcəklərsə, o zaman Azərbaycanda sabitliyi təmin etmək üçün təhlükəsizlik xidmətləri İran təsir agentlərini zərərsizləşdirməyə məcbur olacaqlar".
