Azərbaycan diasporunun təzyiqi qarşısında aciz qalan erməni lobbisi özünün mürtəce, vəhşi simasını ifşa etməyə başlayıb. Azərbaycanla dövlət sərhədində törətdiyi hərbi təxribatı iflasa uğrayan Ermənistanın informasiya platformasındakı manipulyasiyaları da istədikləri sonluqla nəticələnmədi.
Atdığı hər addımda fiaskoya uğrayan düşmən ölkənin son ümidi yeri kimi baxdığı erməni lobbisi də Azərbaycan diaspor fəallarının mütəşəkkil birliyi qarşısında aciz duruma düşdü.
Millət vəkili Könül Nurullayevanın da “Sherg.az”-a dediyi kimi dövlət sərhədində törədilən hərbi təxribat kimi xaricdə yaşayan sivil azərbaycanlılara qarşı zorakılıqları da bumeranq effekti ilə erməni lobbisini çətin sınaq qarşısında qoyub.
K. Nurullayevanın sözlərinə görə, Nikol Paşinyanın bu günlərdə Ermənistanın diasporla iş üzrə komissarının ofisində təmizləmə əməliyyatı aparması, rəhbər vəzifəli şəxslər də daxil olmaqla 13 nəfəri işdən kənarlaşdırması da bu uğursuzluğu təsdiqləyən faktorlardan biridir:
“İyulun ortalarında Ermənistanın Azərbaycanın dövlət sərhəddində törətdiyi növbəti təxribat səbəbindən Azərbaycan diaspor təşkilatlarının göstərdiyi xüsusi fəallıq göstərməsi və erməni diasporunun çoxluq təşkil etdiyi ölkələrdə Azərbaycan diasporuna uduzması Paşinyanı hədsiz hiddətləndirib.
Əslində, erməni baş nazirin diaspora qarşı bu qəzəbi və “təmizləmələri” həm də düçar olduğu uğursuzluğun, həm də hökumət rəhbəri olaraq özündə, eyni zamanda, cəmiyyətdə yaratdığı psixoloji gərginliyi azaltmağa hesablanıb”.
İrəvanda nəşr olunan “Past” qəzetinin yaydığı məlumata istinad edən millət vəkilinin sözlərinə görə, erməni lobbisinin Azərbaycan diasporuna uduzması həm Paşinyanı, həm də bu ölkə ictimaiyyətini qəzəbləndirib, narazılıqlar getdikcə artmaqdadır:
Görünür, Paşinyanın hakimiyyəti dövründə daxili-xarici siyasətdə ciddi boşluqlar olduğu kimi, Ermənistan-diaspor münasibətlərində də dərin uçurum yaranıb".
