İrəvan şərtlərlə razılaşmasa, Azərbaycan Ordusu Zəngəzurda hərbi əməliyyatlara başlaya bilər
“Azərbaycan üçün yeni imkanlar yaranıb”. Bu sözləri politoloq Məhəmməd Əsədullazadə deyib. Ekspert bildirib ki, Ermənistan Azərbaycanın ərazi bütövlüyünü tanımazsa, Qarabağ məsələsini qabardarsa, Azərbaycan Ordusu Zəngəzurda hərbi əməliyyatlara başlaya bilər: “1920-ci il xəritəsinə uyğun olaraq bu əraziləri hüquqi cəhətdən özümüzə birləşdirməyə haqqımız çatır. Yeni dünya nizamının bir çox ölkələrin sərhədlərinin dəyişməsi ilə nəticələnəcəyi qaçılmazdır.
Azərbaycan da bu fürsətdən yararlanmalıdır. Rusiyanın Ukraynaya hücumu dünyada yeni siyasi-hərbi böhranı dərinləşdirdi. Diplomatiya öz yerini silahlara verdi. Biz bunun ən aktiv fəaliyyətini İkinci Qarabağ müharibəsinin başlanması ilə gördük. Rusiyanın Ukraynaya qarşı işğalı kuliminasiya nöqtəsi oldu. Artıq İkinci Dünya müharibəsindən sonra soyuq müharibə nizamı işləmir.
Bunun səbəbi beynəlxalq qanunların böyük dövlətlər tərəfindən öz məqsədləri üçün istifadə edilməsidir. Dünyanın siyasi xəritəsi dəyişə bilər.
Əslində sərhədlərin dəyişməsi 2014-cü ildə Rusiyanın Krımı anneksiya etməsinə Qərbin seyrçi qalması ilə başladı. İndi də Rusiya Ukraynanın cənub-şərqini işğal edərək, orada referendum keçirib Rusiyaya birləşdirməyi planlayır. Təəssüf ki, Qərbdə bir neçə mərkəzlər Rusiyanın ilhaq siyasətini dəstəkləyir”.
Ekspertə görə, yeni ittifaqların yaranması ilə ənənəvi təşkilatlar öz missiyasını itirəcək:
“Böyük Britaniya prosesdə mühüm rol oynayır. London Türkiyə ilə birgə yeni siyasi nizamda koordinasiyalı fəaliyyət başladacaq.
Türkiyənin beynəlxalq güc olması Suriyada keçirdiyi əməliyyatlardan asılıdır. Türkiyə zamanla “tampon bölgə” qurduğu əraziləri öz sərhədləri daxilinə sala bilər. Ankaranın buna hüquqi və mənəvi haqqı çatır”.
