"Ermənistandan fərqli olaraq, İran hərbi potensial, texniki inkişafı baxımından daha böyük və ciddi rəqibdir”
“Risklər Azərbaycanı sərhədlərindəki digər ölkələrlə təhlükəsizlik məsələlərinin yaxşı təşkil edilməsinə məcbur edir”
“Azərbaycan da əmin olmağa çalışır ki, Ermənistan və ya İrandan hər hansı təcavüz, hərbi qarşıdurma olarsa, Gürcüstan tərəfdən heç bir təhlükəyə məruz qalmayacaq”
"Azərbaycan hazırda yerləşdiyi coğrafi məkan və içərisində olduğu geopolitik vəziyyət baxımından çətin durumdadır".
Bunu "Sherg.az"a siyasi şərhçi Həşim Səhrablı deyib.
Onun sözlərinə görə, indiki zamanda ölkəmizin sərhədlərində həm siyasi, həm də hərbi anlamda qeyri-sabitlik hökm sürür və real təhlükələr mövcuddur:
"Ermənistandan fərqli olaraq, İran hərbi potensial, texniki inkişafı baxımından daha böyük və ciddi rəqibdir. Risklər Azərbaycanı sərhədlərindəki digər ölkələrlə təhlükəsizlik məsələlərinin yaxşı təşkil edilməsinə məcbur edir. Bura Rusiya və Gürcüstan daxildir. Ermənistanla onsuz da müharibə vəziyyətindəyik. Dəniz vasitəsilə türk dövlətlərindən real bir təhlükə hazırkı şəraitdə görünmür.
Türkiyə ilə isə müttəfiq əlaqələrimiz mövcuddur. İndiki məqamda Rusiya ilə beynəlxalq vəziyyətimizi nəzərə alaraq, demək olar ki, hər hansı qarşıdurma yaxın zamanda gözlənilmir. Burada həm Rusiya və Türkiyə münasibətləri, eyni zamanda rəsmi Moskva və rəsmi Bakı əlaqələri faktoru var. Bildiyimiz kimi, şimal qonşumuz beynəlxalq arenada təklənir. Eyni zamanda Ukraynada çox çətin vəziyyətə düşüb. Ukrayna müharibəsinin Rusiyanın məğlubiyyəti ilə bitməsi mövcud riskləri müəyyən qədər sığortalayır. Çünki rəsmi Moskva özü də Türkiyə və Azərbaycan ilə münasibətləri isti saxlamalı olduğunu anlayır.
Bu o demək deyil ki, öz maraqları fonunda iki qardaş ölkəyə güzəştə gedəcək. Həmçinin hazırda anti-Azərbaycan və anti-Türkiyə əleyhinə Rusiyada hər hansı addımlar da atılmayacaq. Geriyə Gürcüstan qalır. Azərbaycan da əmin olmağa çalışır ki, Ermənistan və ya İrandan hər hansı təcavüz, hərbi qarşıdurma olarsa, Gürcüstan tərəfdən heç bir təhlükəyə məruz qalmayacaq.
Z.Həsənovun da Gürcüstanda keçirəcəyi görüşlər bu istiqamətlərdə olacaq. Ölkələr həm siyasi, həm hərbi, həm də iqtisadi arenada daha mütəşəkkil bir hala gəlmək, inkişaf etmək üçün qarşılıqlı əlaqələr qurmağa məcburdur. Səfər Gürcüstan və Azərbaycan tərəfindən müsbət nəticələrlə yadda qalacaq. Çünki Gürcüstanın özünün də beynəlxalq vəziyyəti çox yaxşı sayılmaz. O özü də təcavüzə, separatizmə, Rusiyanın işğalına məruz qalan bir ölkə kimi indi özünün təhlükəsizliyini daha çox düşünür".
Qeyd edək ki, Azərbaycan Respublikasının Müdafiə naziri general-polkovnik Zakir Həsənov Gürcüstanda rəsmi səfərdədir. Bu barədə Müdafiə Nazirliyi məlumat yayıb.
