Çingiz Qənizadə də Qüdrət Həsənquliyevin təklifinə dəstək verdi
Milli Məclisin deputatı Qüdrət Həsənquliyev “Polis haqqında” qanuna dəyişiklik layihəsinin müzakirəsində təklif edib ki, Azərbaycanda Vahid İstintaq Komitəsi yaradılmalıdır. Q.Həsənquliyev vurğulayıb ki, əldə olunan uğurlarla yanaşı, nöqsanlar da müzakirə edilməlidir: “Azərbaycanda 8 müxtəlif dövlət orqanında istintaq komitəsi var. Qonşu dövlətlərdə olduğu kimi, bizdə də vahid istintaq komitəsi yaradılmalıdır”.
Demokratiya və İnsan Hüquqları Komitəsinin sədri, hüquq müdafiəçisi Çingiz Qənizadə Sherg.az-a açıqlamasında Qüdrət Həsənquliyevin təklifini tam dəstəklədiyini deyib. Ekspert bildirib ki, Q.Həsənquliyev bu məsələyə hüquqşünas kimi yanaşır:
"Ölkədə ayrı-ayrı qurumların tərkibində istintaq idarələri möcvuddur. Hesab edirəm ki, bu, düzgün deyil. Çünki bir qurumun özünün istintaq aparması başadüşülən deyil. O baxımdan düşünürəm ki, ölkədə vahid istintaq komitəsinin yaradılması yaxşı olar. Hələ Milli Məclisin üzvü olarkən, təxminən 6-7 il öncə bir neçə dəfə mətbuatda bu məsələyə toxunmuşam. Vahid İstintaq Komitəsi olsun və bu Komitənin nəzdində müəyyən idarələr - Daxili İşlər Nazirliyi, Gömrük Komitəsi, Ədliyyə Nazirliyi, Sərhəd Xidməti və s. qurumlarla bağlı şöbələr fəaliyyət göstərsin. 8 qurumda ayrılıqda istintaq idarələrinin olması anlaşılmazdır. Orada çalışanları ixtisar etmək də doğru deyil, çünki onlar artıq mütəxəssislərdir. İstintaq idarələri tam tərkibdə yaradılacaq Vahid İstintaq Komitəsinə köçürülə, bir idarə formalaşdırıla bilər. Bu vahid idarəyə də Baş Prokurorluq nəzarət etməlidir. Çünki qanunların icrasına nəzarət hüquqi Baş Prokurorluqdadır. Başqa dövlətlərin təcrübəsinə də baxa bilərik. Həmin təcrübəni Azərbaycanda tətbiq etməyin zamanıdır".
