İyunun 2-si axşam saatlarından iyunun 3-ü gecə saatlarınadək Ermənistan silahlı qüvvələrinin bölmələri növbəti dəfə təxribata əl atıb. Ermənilər dövlət sərhədinin Basarkeçər rayonunun Yuxarı və Aşağı Şorca yaşayış məntəqələri istiqamətlərindən Azərbaycan ordusunun Kəlbəcər rayonunun Zəylik və Yellicə yaşayış məntəqələri istiqamətlərində yerləşən mövqelərini qumbaraatan və iri çaplı silahlardan da istifadə etməklə növbəti dəfə atəşə tutublar. Bu barədə Azərbaycan Müdafiə Nazirliyi məlumat yayıb. Bildirilib ki, ordumuzun bölmələri tərəfindən dərhal cavab tədbirləri görülüb.
Şəxsi heyət və texnika baxımından itkimiz yoxdur. Hazırda bütün istiqamətlərdə vəziyyət bölmələrimizin tam nəzarəti altındadır. Nazirlikdən qeyd edilib ki, Ermənistan tərəfi öz ictimaiyyətinin diqqətini daxildə baş verən proseslərdən yayındırmaq məqsədilə iriçaplı silahlardan istifadə edərək dövlət sərhədində vəziyyəti gərginləşdirməyə çalışır.
Ermənistan tərəfinin sülh sazişinin imzalanmaması üçün əllərindən gələni etdiyini söyləyən ehtiyatda olan polkovnik Elxan Qəniyev "Sherg.az"a açıqlamasında bildirib ki, bu hadisədə iki böyük amil var:
“Birincisi, Azərbaycan ordusunu atəş açmağa təşviq edib, bunu dünya mediasında “bayraq edərək” sülh sazişinin imzalanmasının qarşısını almaq. Digəri isə Ermənistanın baş naziri Nikol Paşinyanı devirmək. Onlar sanki batan adamı xatırladırlar. Bir neçə ay ərzində Laçın dəhlizi bağlanacaq və digər yol istifadəyə veriləcək. Qarabağın onların əlindən çıxacağından qorxan Ermənistan tərəfi sadəcə siyasi gərginlik yaratmaqla məşğuldur. Lakin dövlətimiz onların oyununa gəlməyəcək. Bizim 44 günlük müharibə zamanı özünü sübut etmiş ordumuz var və hər zaman onların cavabını verməyə hazırıq”.
Nihat Müzəffər
