Ermənistanın xarici işlər naziri Ararat Mirzoyan ATƏT-in Minsk qrupunun buraxılması məsələsindən danışıb.
Mirzoyanın sözlərinə görə, sülh sazişinin imzalanmasından sonra Minsk qrupunun fəaliyyətinə ehtiyacın qalmadığını demək olar.
“Sülh sazişinin imzalanmasından sonra deyə bilərik ki, Minsk qrupunun fəaliyyətinə ehtiyac yoxdur, biz institusional olaraq hesab edə bilərik ki, münaqişə sona çatıb”, - o qeyd edib.
Cross Media Təhlil Mərkəzinin analitiki, siyasi şərhçi Mübariz Göyüşlü "Sherg.az"a deyib ki, Mirzoyanın fikirlərini müsbət qiymətləndirmək mümkün deyil:
"Azərbaycan və Ermənistan arasında sülh sazişi imzalandıqdan sonra deyil, ümumiyyətlə, ATƏT-in Minsk qrupu buraxılmalıdır. Bunun üçün hər iki ölkə rəsmi şəkildə müraciət etməli və prosesin icrası təmin olunmalıdır. Mirzoyan isə məsələyə qeyri-müəyyən yanaşaraq konkret mövqe bildirməkdən çəkinir. Halbuki Azərbaycanın ortaya qoyduğu prinsiplər daha məntiqli və ədalətlidir. Minsk qrupunun buraxılması və Ermənistan dövlətinin konstitusiyasında müvafiq dəyişikliklər edildilməsi sülh sazişinin imzalanmasını perspektivdə daha real edəcək.
Buna baxmayaraq, rəsmi İrəvan bu cür bəyanatlarla yenə də siyasi manevrlər etməyə çalışır. Lakin Azərbaycan tərəfi bu kimi manipulyasiyalara yol verməyəcək və öz haqlı mövqeyindən geri çəkilməyəcək".
