Avropa İttifaqı siyasi və iqtisadi birlikdən əlavə həm də hərbi təşkilata çevrilmək niyyətindədir
“Avropa İttifaqının 5 min nəfərlik çevik reaksiya qüvvələri 2023-cü ilə yaradılmalı və işə salınmalıdır”. Bunu Aİ-nin xarici siyasət xidmətinin rəhbəri Jozep Borrel deyib.
Onun sözlərinə görə, Brüsseldə Aİ müdafiə nazirlərinin iclasında yaradılacaq hərbi birləşmənin fəaliyyətinin üsulları müzakirə ediləcək.
"Avropa İttifaqının çevik reaksiya qüvvələri 2023-cü ildə operativ fəaliyyətə hazır vəziyyətdə olmalıdır".
Qeyd edək ki, Aİ üzvü ölkələrin rəhbər şəxsləri tərəfindən bu təklif illərdir səsləndirilir. Bu dəfə isə Avropa İttifaqının ordu yaratmaq məsələsi konkret olaraq gündəmdədir. Avropa İttifaqı nə qədər çalışsa da, neçə illərdir ki, bu barədə fikirlər ortaya qoysa da, ortada bir nəticə yoxdur. Çünki Avropa İttifaqının vahid ordusunu yaratmaq üçün həmin dövlətlərin yalnız iqtisadi yox, həm də hərbi və geosiyasi maraqları üst-üstə düşməlidir.
Lakin son vaxtlar Avropa Birliyi ölkələrinin bir çox məsələlər üzrə yürütdüyü beynəlxalq siyasətin ABŞ-ın xarici siyasəti ilə üst-üstə düşməməsi, müttəfiqlik tələblərinin pozulması fonunda münasibətlər xeyli gərginləşib.
Siyasi şərhçi Əziz Əlibəylinin “Şərq”ə açıqlamasına görə, xüsusən də Rusiya- Ukrayna müharibəsindən sonra Avropa İttifaqına üzv olan ölkələr gördülər ki, Birliyin hərbi müdafiəsi yoxdur:
“Məhz özünümüdafiə məqsədi ilə İttifaqa üzv olan ölkələrin hərbi birləşmələrindən ibarət vahid ordu yaratmaq niyyətinə düşdülər. Bu isə mümkün olmadı. Buna qarşı olan qüvvələrdən biri Rusiya olsa da, ən güclü rəqib Amerika Birləşmiş Ştatlarıdır. Avropa ölkələrinin böyük əksəriyyətində ABŞ-ın hərbi bazaları var. Hərbi məsələlərlə bağlı bütün qərarları da onlar özləri verir. Bütün bunlara rəğmən Avropa İttifaqının NATO-ya rəqib hərbi birləşmə yaratması real məsələdir. Ötən ay baş tutan Praqa sammitində də biz şahidi olduq ki, Avropa İttifaqı siyasi və iqtisadi birlikdən əlavə həm də hərbi təşkilata çevrilmək niyyətindədir. Xüsusən də Almaniya və Fransanın bu məsələdə maraqları daha böyükdür. Hərbi silahlar baxımından, silahlı qüvvələrin yaranması baxımından əsas rol oynaya biləcək əsas dövlətlər də məhz Almaniya və Fransadır”.
