Siyavuş Novruzov: "Xahiş edirəm ki, bu məsələyə diqqətlə yanaşılsın. Korrupsiya harada var, ora yoxlanılır"
Milli Məclisin dünənki iclasında Naxçıvanda aparılan yoxlamalar və həbslər də gündəmə gətirilib. Parlamentin Regional məsələlər komitəsinin sədri Siyavuş Novruzov deyib ki, Naxçıvan həssas bölgədir: "Həssas bölgə ilə bağlı erməninin öyrətdiyi adamlar fikir söyləyirlər. Burada hər hansı siyasi oyunbazlığın qurulmasına heç bir ehtiyac yoxdur. Hüquq-mühafizə orqanları oranı da yoxlayır. Bakıda neçə nazirlik yoxlanıldı, yeddi icra başçısı tutuldu. Bunlar da Azərbaycan vətəndaşlarıdır. Xahiş edirəm ki, bu məsələyə diqqətlə yanaşılsın. Korrupsiya harada var, ora yoxlanılır”. S.Novruzov vurğulayıb ki, Naxçıvan Muxtar Respublikası Prezidentin, dövlətin, dövlətçiliyin arxasındadır, ona sədaqətlidir: “Bir çox adamlar yuyulmamış çömçə kimi özlərini ortaya atıblar. Azərbaycan Prezidenti nəyi, nə zaman, necə etmək lazımdır, hamıdan yaxşı bilir. Naxçıvanın həssas bölgədə yerləşdiyi nəzərə alınmalıdır. Bir tərəfdən İran, digər tərəfdən Ermənistanla ən böyük sərhəd Naxçıvan Muxtar Respublikası ilədir. Həssas bölgə ilə yanaşı, erməninin öyrətdiyi başqa-başqa adamlar çıxışlar edirlər, baş verənlərə münasibət bildirirlər. Naxçıvanlılar dövlətin, dövlətçiliyin arxasındadır, şəhid olmağa hər an hazırdırlar”.
