Rusiya Federasiyası Federal Məclisi Federasiya Şurasının sədri Valentina Matviyenko bu gün Azərbaycan Respublikasının Prezidenti İlham Əliyev ilə görüşdə Bakı-Qroznı istiqaməti üzrə uçuş yerinə yetirən Azərbaycan Hava Yollarına məxsus təyyarənin qəzaya uğraması ilə bağlı başsağlığını çatdırıb.
Valentina Matviyenko bu məsələnin Rusiyanın istintaq orqanları tərəfindən araşdırıldığını və ona obyektiv qiymət veriləcəyini bildirib.
AĞ partiya sədrinin birinci müavini, politoloq Əhəd Məmmədli “Sherg.az”a söyləyib ki, Rusiya Azərbaycanla münasibətlərinin əvvəlki səviyyəyə qayıtmasını istəyir:
“Buna görə də sözügedən yöndə addımlar atır. Hətta bir neçə gün öncə Rusiya kanallarından birində Vladimir Putin iqtidarının əsas agent propaqandası Kisilyov təqdimatında BAM demiryoluna Heydər Əliyevin adının verilməsi ilə bağıı veriliş hazırlamışdılar. Matviyenkonun Azərbaycana səfəri və təyyarə qəzasıyla bağlı söylədiyi fikirlər, eyni zamanda Tacikistan, Belarus, Rusiya prezidentlərinin birgə İlham Əliyevə zəngi Moskva tərəfindən münasibətlərin yaxşılaşması üçün atılan addımlardır. Azərbaycan da Rusiya ilə münasətlərdə prinsipal mövqeyini qoruyub saxlayır. İlham Əliyev XII Qlobal Bakı Forumunda Rusiyaya yönəlik mesaj verdi ki, “İsgəndər” raketlərinin Şuşada nə işi vardı? Azərbaycan tərəfi hələ də təyyarə qəzasıyla bağlı ədalətli mövqe və tələblərin yerinə yetirilməsini gözləyir”.
