“Burada daha çox anti-Azərbaycan, anti-iqtidar təbliğatı aparılır”
“Hətta "bozbaş mollaları" o dərəcədə harınlayıblar ki, ad çəkməkdən də qorxmur, çəkinmirlər, həyasızlaşıblar”
“Eyni zamanda İranın casus şəbəkəsinə aid olan, xüsusilə də Bakının ətraf kəndlərində yerləşdirilmiş adamlar üzə çıxarılmalıdır”
"İranın Azərbaycandakı casus şəbəkəsinə qarşı Daxili İşlər Nazirliyinin keçirdiyi əməliyyat tədbirləri çox uğurludur".Bunu "Sherg.az"a siyasi elmlər doktoru, professor Cümşüd Nuriyev deyib.
Onun sözlərinə görə, əməliyyatların keçirilməsi İranın Azərbaycandakı səfirliyinə hücumla əlaqəli deyil:
"Hər hansı bir əməliyyatın hazırlanması üçün 3-6 ay vaxt tələb olunur. Bu müddət ərzində müşahidələr aparılır, dinləmələr həyata keçirilir, faktlar dəqiqləşdirilir. İşlər Azərbaycanın qəbul etdiyi 1999-cu il "Əməliyyat-axtarış fəaliyyəti" haqqında qanunun müddəalarına əsasən aparılır.
Azərbaycanda "din pərdəsi" altında təxribatçılıq və pozuculuq əməlləri ilə kifayət qədər insan məşğuldur. Qısa bir müddət ərzində DİN 39 nəfəri saxlayıb. Bu günə qədər Daxili İşlər Nazirliyi, Dövlət Gömrük Komitəsi (DGK), Dövlət Təhlükəsizliyi Xidməti (DTX), Dövlət Sərhəd Xidmətinin (DSX) həbs etdiyi narkoticarətçilər də bu və ya digər formada İrana xidmət edirlər. Rəsmi Tehranın lehinə təbliğat aparanların saxlanılması prosesi davam etdirilməlidir.
Çünki həmin şəxslər bu əməllərini təkcə sosial şəbəkələr üzərindən törətmirlər. Eyni zamanda məscidlərə diqqət yönəltmək lazımdır. Xüsusilə, şiə məscidlərində daha çox anti-Azərbaycan, anti-iqtidar təbliğatı aparılır. Hətta "bozbaş mollaları" o dərəcədə harınlayıblar ki, ad çəkməkdən də qorxmur, çəkinmirlər, həyasızlaşıblar.
Ona görə də həyata keçirilən tədbirlər bilavasitə molla rejimini çökdürməyə xidmət edəcək. İranın xüsusi xidmət orqanlarının yaratdığı casus şəbəkəsini müəyyənləşdirmək çox vaxt tələb edir. Yalnız DİN yox, DTX da bu işlə məşğuldur. Təmizləmələr effekt verəcək. İlk növbədə, Azərbaycan sosial şəbəkələrində İranın təbliğatı zəifləyəcək. Ölkəmizdə rəsmi Tehranın dini və siyasi gücü barədə fikirlər gündəmdən düşəcək. Burada şiə adı ilə İrana sevgi "bəsləyənlərin" sayı kütləvi şəkildə azalacaq”.
Professor onu da əlavə edib ki, casusların açıq-aşkar, həyasızcasına olan təbliğatına son qoyulacaq:
“Azərbaycanla İran arasındakı münasibətlər uzun müddət idi ki, sakit keçirdi. Artıq vaxt çatıb. Əməliyyat tədbirləri davam etdirilməlidir. Eyni zamanda İranın casus şəbəkəsinə aid olan, xüsusilə də Bakının ətraf kəndlərində yerləşdirilmiş adamlar üzə çıxarılmalıdır. Şeyxülislam Allahşükür Paşazadənin çox möhtəşəm bir çıxışı var. O həmişə çox az, amma dəqiq danışır. Deyib ki, 40 milyonluq Azərbaycan türkü İranın (fars, molla rejiminin) əsiridir. Amma Azərbaycanın daxilində də minlərlə molla rejiminin agentura şəbəkəsi var. Onlar da rəsmi Tehranın əsiridir. Həmçinin ictimaiyyət bu məsələdə mühüm rol oynamalıdır. Şübhəli şəxs və ya fəaliyyət gördükdə hüquq mühafizə orqanlarına məlumat verilməlidir".
Qeyd edək ki, İranın casus şəbəkəsinə qarşı DİN əməkdaşlarının keçirdiyi əməliyyat tədbirləri nəticəsində Azərbaycanda “din pərdəsi” altında təxribat və pozuculuq əməllərini həyata keçirən 39 nəfər müəyyən edilərək saxlanılıb. Həmin şəxslər sosial şəbəkələr üzərindən İran lehinə təbliğatlar apararaq ölkəmizdəki dini etiqad azadlığından sui-istifadə edərək Azərbaycanda formalaşmış tolerantlıq ənənələrinə xələl gətirmək üçün İran xüsusi xidmət orqanlarının tapşırıqlarını yerinə yetiriblər.
