Qərbi Azərbaycan məsələsi BMT masasında...
Ceyhun Məmmədov: "Ermənistan dövləti üzərinə öhdəliklər götürməli və zəruri addımlar atmalıdır"
Qərbi Azərbaycan İcması BMT-nin Baş katibi Antonio Quterreşə məktub göndərərək Ermənistandan qovulmuş azərbaycanlıların sülh yolu ilə, təhlükəsiz şəkildə və ləyaqətlə geri qayıtmasına yardım etmək üçün Ermənistana BMT missiyası göndərməyi xahiş edib. BMT-nin Katibliyi həmin müraciəti Təhlükəsizlik Şurasının, Baş Assambleyanın, İqtisadi və Sosial Şuranın gündəliyinin münaqişələrin önlənməsi, sülhün qorunması, insan haqları, qaçqınlar mövzusuna dair bəndləri altında BMT-nin rəsmi sənədi kimi yayıb. Qərbi Azərbaycan İcması inanır ki, həmin əhali qrupunun geri qayıtma hüququnun təmin olunması BMT-nin Nizamnaməsinin məqsəd və prinsiplərinin, İnsan Hüquqları üzrə Bəyannamənin və digər universal insan haqları sənədlərinin yerinə yetirilməsinə, habelə bölgədə davamlı sülhün bərqərar edilməsinə mühüm töhfə olacaq.
Millət vəkili Ceyhun Məmmədov "Sherg.az"a açıqlamasında bildirib ki, belə bir sənədin qəbul edilməsi çox önəmlidir. Deputatın sözlərinə görə, bu məsələyə Prezident İlham Əliyev də dəfələrlə toxunub:
"Qərbi Azərbaycandan olan soydaşlarımızın öz dədə-baba yurdlarına geri qayıtması çox önəmli məsələdir və mütləq həllini tapmalıdır. Qərbi azərbaycanlılar bir neçə dəfə Ermənistanın deportasiyasına məruz qalıblar. Doğma yurdlarından qovulublar. Əlbəttə ki, hüquqları pozulan azərbaycanlıların öz yurdlarına geri dönməsi onların ən təbii haqqıdır. O baxımdan İcmanın müraciətinin BMT-nin rəsmi sənədi kimi təsdiq olunması və yayılması Azərbaycanın hədəf və məqsədlərinə mərhələli şəkildə nail olduğunu göstərir. Hesab edirəm ki, bu siyasət davam etdirilməlidir. Uğurlu addımdır. Ermənistan dövləti də bu istiqamətdə üzərinə öhdəliklər götürməli və zəruri addımlar atmalıdır ki, azərbaycanlılar öz torpaqlarına qayıda bilsinlər".
