"Post-müharibə dövrünün ötən 2 il yarım müddətində hələ də sülhün əldə edilməməsi Ermənistanın üçtərəfli bəyanatın öhdəliklərini yerinə yetirməməsi ilə əlaqədardır. Eyni zamanda özünə yeni amillər axtararaq, regiondakı gərgin vəziyyəti daha da kəskinləşdirməsilə bağlıdır".
Bu sözləri "Sherg.az"a millət vəkili Hikmət Babaoğlu Prezident İlham Əliyevin "Heç kim bizimlə ultimatum dili ilə danışa bilməz", - deyə vurğuladığı fikirlərə münasibət bildirərkən söyləyib. Deputatın fikirlərinə görə, Ermənistan hesab edir ki, müxtəlif vasitələrlə Azərbaycana təzyiq göstərə bilər:
"Amma işğaldan azad olunmuş Laçın rayonuna səlahiyyətli nümayəndə təyin edərkən bir daha bu məsələyə qayıtdı. Ölkə başçısı bildirdi ki, heç kim bizim iradəmizə təsir edə bilməz. Əslində regionda ermənilərin təxribat cəhdlərinə qarşı ölkəmizin həyata keçirdiyi tədbirlər də dövlət başçımızın diqqətə çatdırdığı fikirləri bir daha təsdiq edir. Hər təxribatdan sonra Azərbaycan öz iradəsini bir daha qətiyyətlə göstərərək, öz hüquqları gərəyini etməyi bacarıb.
Qarabağda yaşayan erməni icmasını xarici təsirlər altında radikallaşdırılaraq, Azərbaycana qarşı etdiyi qanunsuz hərəkətlər zamanı bu addımlar atılıb. Həmçinin Ermənistan-Azərbaycan sərhədində erməni hərbi birləşmələrinin mövqelərimizi atəşə tutmasından sonra tədbirlər görülüb. Sonuncu belə tədbiri isə ərazimizdən qeyri-qanuni yollar çəkərək, qanunları pozmağa davam edən ermənilərə qarşı gördük.
Nəticə etibarilə, aydın oldu ki, istər qərb, istər şimal, istərsə də cənubda Ermənistana kim nə söz versə də, əməldə rəsmi İrəvanın arxasında dura bilmirlər. Ona görə də dövlətimizin atdığı addımlar məhz sülhü nəzərdə tutur. Ermənilər nə qədər ki, bizə təzyiq etməyə çalışacaqlar, sülhə nail olmayacağıq. Bu səbəbdən Azərbaycan həyata keçirdiyi tədbirlərin məntiqi yekunu olaraq, Laçın dəhlizinə nəzarət buraxılış məntəqəsi quraşdırmaqla da sülhü daha da yaxınlaşdırmış olacaq. Ermənilər dərk edəcəklər ki, artıq heç bir çıxış yoxdur. Himayədarları, söz verənləri düşmən ölkənin arxasında dura bilmirlər. Azərbaycanla sülhə gəlməkdən başqa bir əlac yoxdur. Bu, ən doğru yoldur".
Qeyd edək ki, Ölkə lideri, Prezident İlham Əliyev Məsim Məmmədovu Prezidentin Şərqi Zəngəzur iqtisadi rayonuna daxil olan Laçın rayonunda xüsusi nümayəndəsi təyin olunması ilə əlaqədar qəbul edərkən bildirib:
"Müharibədən ötən iki il yarım müddət ərzində bütün dünya, eyni zamanda, anti-Azərbaycan qüvvələr bizim əyilməz iradəmizi gördü. Heç kim bizim iradəmizə təsir edə bilməz. Heç kim bizimlə ultimatum dili ilə danışa bilməz. Biz bunu İkinci Qarabağ müharibəsində Ermənistana sübut etmişik, müharibədən keçən iki il yarım ərzində Ermənistanın himayədarlarına sübut etmişik”.
