Azərbaycan və Türkiyə müttəfiqlik bəyannaməsi ilə öz güclərini birləşdirdilər
“2021-ci ildə Türkiyə və Azərbaycan arasında müttəfiqlik sazişinin həm iyunun 15-də, həm Şuşa şəhərində imzalanması simvolik xarakter daşıyır”. Bu sözləri “Şərq” qəzetinə açıqlamasında Türkiyədə yaşayan tanınmış azərbaycanlı alim, Ankara Universitetinin professoru, siyasi şərhçi Toğrul İsmayıl deyib.
Professor bildirib ki, 44 günlük müharibədən sonra Şuşa Bəyannaməsinin imzalanması xüsusi əhəmiyyət kəsb edirdi: “İki qardaş ölkənin əməkdaşlığının, əlaqələrinin strateji müttəfiqlik səviyyəsinə qaldırılması mühüm idi. Ötən bir il ərzində Azərbaycan və Türkiyə bir çox məsələdə vahid mövqe sərgiləyib, birgə addım atıblar. Təhlükəsizlik şuralarının birgə iclası, alınan qərarlarda ortaq məxrəcə gəlinməsi, bölgəmizdə baş verən proseslərin dəyərləndirilməsi, Qarabağ məsələsinin tamamilə həll edilməsi, İrəvanla gedən sülh danışıqları, Zəngəzur dəhlizi və s. məqamlar Şuşa Bəyannaməsi fonunda xüsusi önəm kəsb edir. Azərbaycan və Türkiyə müttəfiqlik bəyannaməsi ilə öz güclərini birləşdirdilər. Yeni geopolitik vəziyyət elan etdilər.
Tərəflər arasındakı münasibətlər, regional inkişaf prosesləri, “3+3” əməkdaşlıq modeli və başqa proseslər məhz Şuşa Bəyannaməsi əsasında cərəyan edir.
Bütün bu proseslər fonunda bölgədəki güc balansı nöqteyi-nəzərindən və Azərbaycanın əlinin güclənməsi baxımından Şuşa Bəyannaməsi zamanında verilmiş ən doğru qərarlardan biridir. Bəyannamə iki ölkənin əməkdaşlığının yaxın zamanda daha da inkişafı üçün olduqca əhəmiyyətlidir”.
