Dünya ictimaiyyətini də bu məsələdə Moskva və İrəvana qarşı səfərbər etməliyik
“44 günlük müharibədən öncə də ermənilərin əsas hücumu, təxribatı məhz Tovuz istiqamətində olmuşdu”. Bu sözləri “Şərq”ə AĞ Partiyanın sədri Tural Abbaslı deyib. Rusiyanın Ermənistan-Azərbaycan sərhədinin Tovuza yaxın bölgəsində hərbi baza yerləşdirməsi iddiası ilə bağlı danışan partiya rəhbəri qeyd edib ki, Azərbaycanın Qərbə gedən önəmli strateji yolları, dəmiryol xətləri, neft kəmərləri Tovuz rayonundan keçir:
“Tovuz kommunikasiya baxımından Azərbaycan üçün xüsusi önəm kəsb edir. Böyük ehtimal ki, məhz bu məqamlarla bağlı rəsmi Bakıya təzyiq göstərmək üçün Ermənistanın Ayqepar kəndində rusların iştirakı ilə tikinti işləri aparılır. Orada rus bazasının olacağı ilə bağlı iddialar var. Hər halda kifayət qədər narahatedici faktordur. Düşünürəm ki, bu məsələdə Azərbaycan hərbi-strateji baxımdan adekvat addımlar atmalıdır. Həmin ərazidə hərbi birləşmələrimizin, sərhəd xidmətinin daha da gücləndirilməsi istiqamətində işlər görülməlidir. Mümkün təxribatların dərhal və kəskin formada qarşısının alınması üçün lazımi addımlar atılmalıdır. Eyni zamanda da Rusiya və Ermənistanın regiondakı vəziyyəti daha da gərginləşdirməsi üçün atdığı addımları beynəlxalq ictimaiyyətin diqqətinə çatdırmaq lazımdır. Dünya ictimaiyyətini də bu məsələdə Moskva və İrəvana qarşı səfərbər etməliyik. Əgər birbaşa Kremlə və İrəvana “niyə sərhəd yaxınlığında hərbi baza tikirsiz” deyə bilmiriksə, Türkiyə kimi müttəfiqlərimizlə birgə zəruri mesajlarımızı qarşı tərəfə çatdırmalıyıq. Cavabsızlıq erməniləri və rusları daha da həyasızlaşdıra bilər”.
