Qocalmış Avropanın dünyaya sırımaq istədiyi dəyərlər qeyri-ədalətlidir
Türkiyə Prezidenti Rəcəb Tayyib Ərdoğan növbəti dəfə Qərbi sərt ittiham edib. Ərdoğan vurğulayıb ki, Qərbin yaratdığı “təhlükəsizlik sistemi” çökməkdədir. Türkiyə lideri deyib ki, Qərb ölkələri Ankaranın BMT Təhlükəsizlik Şurasında islahatların aparılması zərurəti barədə ideyası ilə razılaşmağa başlayıblar: “Ankaranın tələbləri yerinə yetirilmədikcə, İsveç və Finlandiyanın NATO-ya qəbulu ilə bağlı Türkiyənin mövqeyi dəyişməyəcək”. Türkiyə prezidenti, o cümlədən rəsmilər ABŞ və Avropanın “təhlükəsiz sistemini”, sadəcə özlərinə işləyən “demokratik dəyərlərini” dəfələrlə suçlayıblar. Ərdoğan dəfələrlə Qərb strukturlarının yenidən dizayn olmasının zərurətindən danışıb.
NATO-nun ən güclülərindən olan Türkiyənin qəti mövqeyini “Şərq”ə dəyərləndirən siyasi elmlər doktoru, professor Cümşüd Nuriyev Ərdoğanın haqlı olduğunu söyləyib. Professor xatırladıb ki, “dünya beşdən böyükdür” ifadəsi də məhz Türkiyə liderinə məxsusdur:
“BMT yarandığı gündən bu yana öz fəaliyyətini çox uğursuz həyata keçirib. Bu qurumun statusu böyük zədə alıb. İndiki məqamda bütün dünyanın taleyi sadəcə beş ölkəyə həvalə edilə bilməz. Nəzərə alaq ki, beş ölkədən heç biri əhalisi müsəlman olan dövlət deyil. Yəni təşkilatda iki milyarda yaxın müsəlmanın təmsilçisi yoxdur. ABŞ da birmənalı şəkildə BMT ilə razılaşmır. Ona görə də bu qurumda hansısa haqq-ədalətdən danışmaq olmaz.
Ərdoğan BMT və NATO-nun qurum kimi fəaliyyətsizliyindən gileylənir. Bu strukturlar Ukrayna ilə bağlı təhlükəsizlik məsələsində ortaya əsaslı mövqe qoya bilmədi. Çox dişsiz mövqe sərgilədilər. 29 dövlətin daxil olduğu beynəlxalq hərbi təşkilat – NATO Rusiya qarşısında bioloji cəhətdən məğlubiyyətə uğradı. O baxımdan Türkiyənin təklif etdiyi variant doğrudur.
BMT-nin Təhlükəsizlik Şurasında, daimi üzvlük məsələsində redaktələr mütləq olmalıdır. Necə olar ki, quruma sonradan qoşulan Fransa TŞ-nin üzvü ola bilir, amma Türkiyə kimi güclü bir dövlət ola bilmir?! Əminəm ki, qardaş Türkiyə bu “döyüşü” udacaq. Çünki Ankaranın qaldırdığı məsələ dünyanın bir çox aparıcı ölkəsinin də maraqlarına uyğundur. Qocalmış Avropanın dünyaya sırımaq istədiyi dəyərlər qeyri-ədalətlidir.
Əgər Qərb təhlükəsiz yeni dünya nizamında maraqlıdırsa, beynəlxalq təşkilatların idarəetməsində mütləq türk-müsəlman dövlətinin təmsilçisi də olmalıdır”.
