İranda 12-ci prezident seçkilərində iştirak etmək istəyənlərin adlarının qeydiyyata alınması prosesi aprelin 15-də (bugün) başa çatır. Seçkilər isə mayın 19-da keçiriləcək. İran Seçki Komissiyasının katibi Əli Purəli Motləq seçkilərə namizədliklə bağlı 644 nəfərin qeydiyyatdan keçdiyini bildirib.
Namizədlərin 21-i qadınlardır. Ekspertlərə görə, prezidentlərin ali dini rəhbər tərəfindən seçildiyi teokratik rejimə sahib olan İranda bu qədər namizəd sayısı sadəcə "demokratik” və "azad seçki” görüntüsü yaratmağa hesablanıb.
Məsələ ilə bağlı "Şərq”ə danışan politoloq İlqar Vəlizadə deyib ki, İranda seçki sistemi özünəməxsus prinsiplər əsasında formalaşıb:
"İran seçkilərində "orijinal” müddəalar hökm sürür. Məsələn, Amerikada prezident seçkilərində ilkin namizədlərin sayı çox olur, amma onlar müvafiq mərhələdən keçdikdən sonra daha real namizədlər müəyyənləşər və seçki mübarizəsi həmin şəxslər arasında gedir. İranda 644 namizədin qeydiyyata alınması da onların hamısının seçki marafonuna qatılacağı anlamına gəlmir. Namizədlər arasında "layiqlilər” İranın dini rəhbəri tərəfindən seçilir”.
Ekspertin sözlərinə görə, prezidentliyə namizədlər siyasət aləmindəki müəyyən qruplar arasından - konservatorlar, mühafizəkarlar, reformistlər, islahatçılar və mərkəzçilərdən seçilir: "644 namizədin hamısı bəlli qrupların içindən çıxır. Nəticə etibarı ilə orta mərhələdə ən parlaq namizədlər seçilir, digərləri isə marafondan kənarda qalırlar. Təbii ki, sonrakı mərhələdə namizədlər bir-bir sıradan çıxır. Əsas seçim sona qalan iki-üç real namizəd arasında baş tutur. Uzun illərdir İranda status-kvo dəyişməz olaraq qalır və mübarizə eyni siyasi qruplar arasında gedir. İranın gələcək rəhbəri postuna ən real namizəd isə indiki Prezident Həsən Ruhanidir. Bunun səbəbi isə odur ki, Ruhaniyə Ali Rəhbər tərəfindən dəstək verilir. Əgər Ruhani dini rəhbərin dəstəyini itirərsə, seçilmə şansını da itirəcək”.
İsmayıl
