Amerika Birləşmiş Ştatlarının Konqresi sabiq prezidentlərin pensiyasını azaldıb. ABŞ qanunvericiləri ümumi razılığa gəliblər ki, keçmiş başçıların dövlət tərəfindən göstərilən maliyyə dəstəyinə ehtiyacı yoxdur. Çünki onlar yazdıqları kitablardan, kütlələrin qarşısındakı çıxışlardan milyonlar qazanırlar.
Hesablamaya görə, keçmiş prezidentlər üçün 2017-ci ildə ümumi ödənişlər vergi ödəyicilərinə 2,84 milyon dollara başa gəlib. Yeni qanuna uyğun olaraq, keçmiş prezidentlərin pensiyası ildə 200 min dollara qədər, personalın və işçi mühitin saxlanmasına görə ödənilən məbləğ isə 500 min dollara qədər azaldılacaq. Bir sıra ekspertlər bu qərarı qlobal iqtisadi böhranla, digərləri isə birbaşa prezident Trampın islahatları ilə əlaqələndiriblər.
Məsələni "Şərq”ə dəyərləndirən iqtisadçı-ekspert Natiq Cəfərli deyib ki, ABŞ-ın 5 trilyon dollarlıq dövlət büdcəsini və 15 trilyon dollarlıq iqtisadiyyatını nəzərə alsaq, keçmiş prezidentlərə ayrılan vəsaitin o qədər də böyük olmadığını görərik:
"Ölkədə elə bir iqtisadi çətinlik mövcud deyil ki, bu səbəbdən eks rəhbərlərin ödənişləri kəsilsin. Fikrimcə, ABŞ administrasiyası məsələyə fəlsəfi yanaşmanı dəyişdirmək istəyir. Belə bir yanaşma ortalığa qoymağa çalışırlar ki, eks-prezidentlərin, məsələn, Bil Klintonun prezidentlikdən sonra universitetlərdə və beyin mərkəzlərində hər çıxışı 20 min dollardır. Keçmiş prezidentlər idarəçiliklə bağlı müxtəlif toplantılara dəvət olunur və mühazirələr deyirlər. Hətta kitablar yazır, televiziya verilişlərində iştirak edərək yüksək qonorar alırlar.
Özlərinə pul qazanmaq üçün kifayət qədər geniş imkanlara sahibdirlər. Sadəcə bu statistikanı əsas gətirərək onların ödənişlərini azaltmağı düşünürlər”. Ekspertin fikrincə, dəyişikliyin Donald Trampla da əlaqəsi var: "Tramp öz prezidentlik maaşından imtina etdi. O, sadəcə 1 dollar məbləğində simvolik maaş alır. Hətta bu addımı ilə tarixə düşdü.
Güman etmək olar ki, Konqresə belə bir təklif məhz Ağ Evdən verilib. Əgər hazırda prezidentlik vəzifəsini icra edən Tramp əlavə gəliri olduğu üçün öz rəsmi maaşından imtina edə bilirsə, deməli, xeyli pul qazanan keçmiş rəhbərlərə dövlətin pul ödəməsinə də ehtiyac qalmır”.
İsmayıl
