"Rusiya-Türkiyə münasibətlərinin yaxşılaşması birmənalı şəkildə bəzi dövlətləri narahat edəcək”.
Bunu "Sherg.az”a Türkiyənin Rusiyadan S-400 raketləri almasından danışarkən Qərv universitetinin professoru, politoloq Fikrət Sadıqov söyləyib.
O xatırladıb ki, Türkiyə silahlı qüvvələri NATO-nun ən iri və aparıcı rol oynayan qoşunlarındandır:
"Türkiyə uzun illərdir ki, Qərb ölkələri alyansında olan dövlətdir. Son zamanlar Ankaranın addımları ABŞ başda olmaqla bir sıra dövlətləri qıcıqlandırır. Amma digər reallıq odur ki, Qərb ölkələri Türkiyəyə arxa çevirir. Çünki birincisi, neçə ildir, Türkiyəni Avropa İttifaqına (Aİ) qəbul etmirlər. Müxtəlif bəhanələr, şərtlər irəli sürülür.
Digər yandan, Ankaranın ehtimalına görə, ABŞ-ın 15 iyul hadisələrində əli var. Türkiyə düşünür ki, əsas oyunçu olan Fətullah Güləni ABŞ buna görə qaytarmır. Burada da müxtəlif bəyanatlar ortaya atılır.
Türkiyə terrora qarşı vuruşan dövlətdir. Daxildə də bu dövlət PKK-çılara və digər terror qruplarına qarşı mübarizə aparır. Ona görə, kommersiya əsasında Rusiyadan silah alması təbii haldır. Bu, o deməkdir ki, Türkiyə öz maraqlarına uyğun addım atır, təhlükəsizliyini təmin edir. Bu isə regionda stabilliyin artmasına təkan verir”.
Qeyd edək ki, Türkiyənin müdafiə naziri Nurəddin Canikli Ankaranın Rusiyadan "S-400” raketlərini aldığını bildirib. Onun sözlərinə görə, axır ki, bu iş uğurla başa çatıb.
Aysel Aslan
