Manatın devalvasiyasından sonra insanlar prosesdən daha az itki ilə çıxmaq üçün yollar axtarır.
Ciddi maddi-iqtisadi sıxıntılar yaşamağa başlanılan indiki zamanda sürücülər pullarına qənaət etmək üçün şəxsi avtomobillərindən imtina etmək məcburiyyətində qalırlar.
Benzin xərcindən əlavə sürücülərin cərimə və qəza zamanı ciddi maddi ziyana məruz qaldıqları üçün avtomobillərini ya satırlar, ya da zəruri hallarda ondan istifadəyə üstünlük verirlər. Qalan hallarda isə ictimai nəqliyyatdan istifadəyə üstünlük verirlər. Sürücülərin avtomobildən istifadə hallarının azalması həm ekoloji, həm də tıxacların azalması baxımından təqdirəlayiq olsa da, metro və marşrut avtobuslarında sıxlıq yaranmasına rəvac verir.
Nəqliyyat üzrə ekspert Ərşad Hüseynov da son zamanlar insanların şəxsi avtomobillərindən imtina etməsi səbəbindən ictimai nəqliyyatda sıxlığın artması faktını təsdiqləyib. Özlüyündə bu prosesin müsbət hal olduğunu qeyd edən Ə.Hüseynovun sözlərinə görə, kaş ictimai nəqliyyata tələbatın artması əhalinin maddi sıxıntıları ilə bağlı olmayaydı.
"Sırf imkansızlıq səbəbindən insanların şəxsi avtomobilləri idarə etməkdən imtina etməsi istənilən halda təəssüf doğurur. Çox yaxşı olardı ki, insanlarımız şüurlu şəkildə ictimai nəqliyyata üstünlük verməyin daha sərfəli və daha əhəmiyyətli olduğunu dərk edərdilər. İctimai nəqliyyat ən rahat yerdəyişmə vasitəsidir. Dünya ölkələrində ictimai nəqliyyatdan istifadə xüsusi mədəniyyət hesab olunur. İnkişaf etmiş ölkələrdə bir neçə avtomobili olan milyonçu da məmnuniyyətlə ictimai nəqliyyatdan istifadə edir.
Bu, çox gözəldir. Buna alışmaq lazımdır. Həmişə ictimai nəqliyyatda gediş fərdi avtomobillə gedişdən ucuz olur. Mən dəfələrlə sürücülərə lüzumsuz yerə avtomobillərindən istifadə etməməyi tövsiyə etmişəm. Avtomobillə gedəcəkləri yerləri saf-çürük edib, hər xırda şeyin dalınca maşın sürməsinlər. Unutmayaq ki, avtomobil insan həyatının ayrılmaz hissəsi deyil. Onsuz yaşamaq, onunla yaşamaqdan rahatdır”.
İctimai nəqliyyatda yaranan sıxlıq probleminin aradan qaldırılmasına gəldikdə isə nəqliyyat eksperti deyib ki, aidiyyəti qurumlar bu problemi aradan qaldırmaq üçün müvafiq addımlar atmalıdır. Ya marşrut xətlərinin hərəkət qrafiki sıxlaşdırılmalı, ya da avtobusların sayı artırılmalıdır.
Şəymən
