Suraxanı rayonu, Qaraçuxur qəsəbəsi və Yeni Günəşli massivinin sakinləri 50 və 64 saylı marşrut avtobuslarının işindən narazıdır. Səhər və axşam saatlarında "ças-pik” deyilən vaxtlarda, bu marşrut avtobuslarına minmək əməlli-başlı zülmə çevrilir.
Konkret olaraq ötən şənbə günü saat 09:00 radələrində Hacıbala Abutalıbovun Suraxanı rayonu ərazisində qoydurduğu heyvan heykəlləri - "Qartal” və "şir”in qarşısındakı dayanacaqda insanlar dəqiqələrlə peşman bir şəkildə dayanıb nə zaman avtobusa minmək "şərəfinə” nail olacaqları zamanı gözləyiblər, çünki ard-arda gələn avtobuslarda sərnişin sıxlığı səbəbindən sürücülər dayanacaqda avtobusu saxlamayıb, "yel kimi” ötüb keçib. Anlaşılandı ki, deyilən vaxtlarda sərnişin sıxlığı yaşanır, basabas olur. Amma bunun da bir həlli olmalıdır. Sərnişinlər 50 və 64 saylı xətlərə iri tutumlu avtobusların verilməsini istəyir. Bu marşrut xəttindəki avtobuslar orta tutumlu olduqlarından (avtobuslar texniki cəhətdən də istifadə müddətini çoxdan başa vurub. Avtobusların özü də qırıq-sökükdü, oturacaqları da. Başdan-ayağa natəmizlikdir - red.) işə gedilən və işdən qayıdılan vaxtlarda bu avtobuslara minmək müşkülə çevrilir. Sərnişinlər biri-birini itələyə-itələyə, qapı ağzında dayana-dayana birtəhər evlərinə gedir.
Problemlə əlaqədar dünən Bakı Nəqliyyat Agentliyi ilə əlaqə saxladıq. BNA-nın ictimaiyyətlə əlaqələr şöbəsinin sektor müdiri Mais Ağayev "Şərq”ə açıqlamasında problemin həlli üçün yeni avtobusların gətirilməsinin vacib olduğunu dedi:- Bakı Nəqliyyat Agentliyi sərnişindaşıma sahəsində göstərilən xidmətin keyfiyyətinin artırılması, bu sahədə mövcud çatışmazlıqların aradan qaldırılması istiqamətində bir sıra tədbirlər həyata keçirir. Bu gün sərnişindaşımada mövcud olan avtobusların 50 faizdən artığının yenilənməsinə ciddi ehtiyac var. Bakı Nəqliyyat Agentliyinin tələbinə uyğun olaraq bu il daşıyıcılar tərəfindən yeni nəqliyyat vasitələrinin gətirilməsi nəzərdə tutulub. Yeni nəqliyyat vasitələri gətirildikcə, problemli xətlər üzrə avtobuslar yenilənəcək. Kart sisteminə keçid də məhz nəqliyyat vasitələrinin yenilənməsinə bağlı məsələdir. Avtobusların yenilənməsi ilə kart sisteminə keçiddə təmin ediləcək.
Məlahət Rzayeva
