"Ermənistanda vaxtaşırı dəyişikliklər baş verir və hakim qüvvələr ziddiyyətli bəyanatlar səsləndirir”.
Bunu "Sherg.az”a açıqlamasında Qərbi Kaspi Universitetinin professoru, politoloq Fikrət Sadıqov deyib.
Professor bildirib ki, Moskva ilə münasibətləri ən yüksək səviyyəyə qaldırırıq. Bu da təsadüfi deyil:
"Rəsmi Bakı başa düşür ki, Rusiya yaxın tərəfdaş, qonşu dövlət və Minsk Qrupunun həmsədr ölkəsi kimi bu məsələdə açar rolunu oynaya bilər. Çünki Rusiya uzun zamandır Ermənistanla yaxın münasibətdə olan bir dövlətdir. Bu baxımdan gələn illə bağlı müəyyən ümidlər var. Ümidlər onunla bağlıdır ki, Ermənistanda yeni hökumət var və seçimdən sonra fəaliyyətə başlayacaq. Paralel olaraq, xarici işlər nazirlərinin bir neçə dəfə görüşməsi, dövlət başçısı cənab İlham Əliyev ilə Ermənistanın baş naziri Nikol Paşinyan arasında baş tutan ayaqüstü təmaslar müəyyən proseslərin başlanğıcı hesab oluna bilər. Biz Ermənistanın yeni hökumətinə şans veririk. İstəyirik ki, yeni hökumət əvvəlki rejimin səhvlərini təkrarlamasın və onlardan dərs çıxartsın. Əgər Paşinyan ağıllı istiqamətdə hərəkət edərsə, münaqişənin həllində irəliyə doğru addım atmaq mümkün olacaq. Bu, həm də Ermənistanın düşdüyü ağır vəziyyətdən çıxış yolu deməkdir”.
Qeyd edək ki, Rusiya Xarici İşlər Nazirliyinin rəsmi nümayəndəsi Mariya Zaxarova Moskvanın Dağlıq Qarabağ münaqişəsinin nizamlanması üçün hər şeyi edəcəyini deyib. XİN rəsmisi bəyan edib ki, həmsədr ölkə olan Rusiya üzərinə götürdüyü öhdəliyi yerinə yetirəcək: "Bu məsələdə vaxt həddi qoyulmur. Əgər vaxt barədə danışsaq, hər zaman münaqişənin tez bir vaxtda nizamlanmasının və buna yönəlmiş tədbirlərin tərəfdarı kimi çıxış etmişik. Amma dəqiq vaxt barədə danışmaq çətindir. Təəssüf ki, bu, uzanmış münaqişədir. Biz həmişə münaqişənin tezliklə həll olunmasına çalışmış və bu problemin tezliklə həllinə yönələn addımları dəstəkləmişik”. "Rəsmi Moskvanın XİN rəhbərlərinin yanvar ayında görüşünün təşkilatçısı kimi çıxış etməsi mümkündürmü” sualını cavablandıran Zaxarova onda belə bir məlumatın olmadığını söyləyib.
İsmayıl
