"Haqqında danışılan məsələ jurnalistikaya aid deyil. Burada jurnalistikadan deyil, sırf dələduzluqdan və jurnalistikadan sui-istifadə hallarından söhbət gedir”.
Bunu "Sherg.az”a açıqlamasında Mətbuat Şurası İdarə Heyətinin üzvü Azər Həsrət deyib.
Tanınmış jurnalist bildirib ki, bu adamların jurnalistikaya heç bir dəxli olmadığı üçün onlarla bağlı söhbəti media ilə əlaqələndirmək doğru deyil:
"Ona görə də düşünürəm ki, burada hansısa mətbuat və söz azadlığının "boğulması”ndan ümumiyyətlə danışmaq olmaz. Digər tərəfdən Azərbaycanda normal jurnalistika ilə məşğul olan, jurnalistlərin peşə davranışı qaydasına uyğun fəaliyyət göstərən heç kim ciddi problemlə üzləşmir.
Düzdür, bəzən informasiya əldə etməklə bağlı çətinliklər olur. Yaxud da ayrı-ayrı məmurların kobudluğu hallarına rast gəlinir.
Bunlar da müvafiq şəkildə araşdırılır və layiqli qiymətini alır. Hətta dəfələrlə olub ki, kobudluğa yol verənlər, jurnalistlərin hüquqlarını pozanlar üzr istəyiblər, səhvlərini anladıqlarını deyiblər. Yəni məsələ öz həllini tapıb. O səbəbdən ümumilikdə götürəndə heç də Azərbaycanda mətbuatın boğulması kimi bir dövlət siyasəti yürüdülmür”.
A.Həsrət düşünür ki, bu cür hadisələrdə manipulyasiya etməyə cəhd edənlər sadəcə olaraq səmimi insanlar deyillər:
"Onlar bulanıq suda balıq tutmağa çalışanlardır. Təbii ki, elə adamların də əməlləri heç vaxt baş tutmayacaq və istəklərinə nail ola bilməyəcəklər”.
İsmayıl
