"Dəbdəbəli qəbirüstü abidələrin ləğvi çox müsbət addımdır”.
Bu barədə "Sherg.az”a Naxçıvanda qəbirüstü işlərin təsviri ilə bağlı qərar qəbul edilməsinə münasibət bildirərkən millət vəkili Tahir Kərimli bildirib.
Deputat müxtəlif ölkələrin bu məsələdə öz qaydaları olduğunu söyləyib:
"Təxminən 25 il əvvəl Amerikada oldum. 27 minə yaxın qəbir olan, məşhur bir qəbiristanlığı ziyarət etdim. Bütün qəbirlər eyni idi. Əsgəri də, generalı da, alimi, varlısı, kasıbı da - hamısı eyni cür qəbirlər idi. Sözün əsl mənasında səliqə-səhman hökm sürürdü. Bütün insanların həqiqətən sonda bərabər olduğuna işarə idi.
Vaxtilə Suriyada da böyük qəbiristanlıqda belə hal gördüm. Peyğəmbərin sevimlisi Bilalın qəbri olan bu qəbirstanlıq da sadə idi. Ölkələrin dinindən asılı olmayaraq, belə müsbət nümunələr çoxdur.
Xüsusilə, bu, İslam dinində insanların allah qarşısında bərabərliyini ehtiva etmək üçün vacib məsələdir. Ona görə, Naxçıvanda həmin qaydaların tətbiqini müsbət qiymətləndirirəm. İnsanlar bir-birindən fərqlənməməlidir.
Ali məhkəmədə işlədikdə insanlar mənə dedilər ki, rüşvət almırsan, heç olmasa yaxınlarının qəbirinin üstünü dəbdəbəli düzəldək. Lakin razı olmadım. İndinin özündə də yaxınlarımın qəbrinin üzərində adi mərmər belə yoxdur. Əvvəldən belə halların tərəfdarı olmamışam.
Hesab edirəm ki, hamımız yeni qaydalara riayət etməliyik. İnsanlara sağ ikən hörmət etmək lazımdır. Bu məsələləri gündəmə gətirdiyinə görə, Dini Qurumlarla iş üzrə dövlət Komitəsinin sədri Mübariz Qurbanlıya təşəkkür edirəm. Məhz onun sayəsində dəbdəbəli qəbirüstü abidələrin ləğvi aktuallaşdı və həmin istiqamətdə ciddi işlər görülməyə başlandı".
Qeyd edək ki, Naxçıvan Muxtar Respublikası Nazirlər Kabinetinin 2017-ci il 8 noyabr tarixli, 115 nömrəli qərarı ilə yeni qaydalar təsdiq edilib. Qərara görə, bundan sonra Naxçıvanda bütün qəbirüstü abidələr bir formada olacaq.
Aysel Aslan
