Parlamentin Ailə, qadın və uşaq məsələləri komitəsinin sədri Aqiyə Naxçıvanlı ölkəmizdə 3 yaşına qədər uşaqları olan ailələrə verilən müavinətin artırılmasını təklif edib. Komitə sədri bu barədə 2018-ci il üzrə Azərbaycanın dövlət büdcəsi layihəsinin müzakirəsi zamanı deyib.
A.Naxçıvanlı bildirib ki, müavinətlər dəyişiklik edilmədən 3 il müddətinə sabit qalsın. Onun sözlərinə görə, Prezidentin müvafiq sərəncamı ilə Azərbaycanda sosial evlər inşa olunur: "Güzəştli sosial evlərin ipoteka müəllimlər və həkimlər üçün verilməsini də təklif edərdim. Bu onların işlərinə stimul yarada bilər. Məişət zorakılığının qarşısının alınması ilə məşğul olan qurumların fəaliyyətinin gücləndirilməsinə böyük ehtiyac var”.
Yeni təkliflərlə bağlı "Qadın Liderliyi Uğrunda” İctimai Birliyinin sədri Ülkər Abdullayeva fikirlərini "Şərq”lə bölüşüb. O bildirib ki, "Uşağa qulluğa görə qismən ödənişli sosial məzuniyyətdə olanlara verilən müavinətin artırılması haqqında” 2013-cü il 23 avqust tarixli 3082 nömrəli sərəncam var.
Həmin sərəncama əsasən bir yaş yarımadək uşağa qulluğa görə qismən ödənişli sosial məzuniyyətdə olanlara verilən aylıq müavinətin məbləği 30 manat, bir yaş yarımdan üç yaşınadək uşağa qulluğa görə isə həmin müavinətin məbləği 15 manat miqdarında müəyyən edilib:
"Bu, əlbəttə çox simvolik bir məbləğdir. Hətta o qədər simvolikdir ki, ailələrin böyük əksəriyyəti heç bu məbləğə görə tələb olunan sənədləri toplamaq, bürokratik problemləri həll etmək zəhmətinə qatlaşmaq belə istəmirlər. Baxmayaraq ki, bu müavinət məcburi dövlət sosial sığorta haqqı hesabına ödənilir, bir çox hallarda ana, ata, yaxud da uşağa qulluğu öz üzərinə götürən digər şəxs bu məbləği əldə etməyə can atmır. Valideynlər daha çox işləməyə və aldıqları məvacib hesabına uşağa qulluğu təmin etməyə çalışırlar. Əvvəla, Aqiyə xanımın təklifinin yerinə yetirilməsi üçün öncə məcburi dövlət sosial sığortasının məbləği artmalıdır. İkincisi, bu müavinətlər o həddə olmalıdır ki, uşağa qulluq göstərən şəxsin ehtiyaclarını az da olsa qarşılaya bilsin. İş orasındadır ki, parlamentdəki təkliflər nəticəsində həmin müavinətlər cüzi artacaq.
Yenə də o ehtiyacı qarşılayacaq həddə olmayacaq. Bu cür təkliflərin yerinə yetirilməsi üçün reallıqlardan çıxış etmək lazımdır. İnsanların aldığı maaşlar o səviyyədə olmalıdır ki, məcburi dövlət sosial sığortasının da məbləği artsın. Amma hazırda ölkəmizdə bunun üçün real şərtlər yoxdur. Bu olmayanda isə hansısa müavinətləri cüzi artırmaqla heç nəyə nail olmaq olmaz. Bu, uzağı hökumətin müsbət sosialyönümlü addımlarından biri kimi qeydiyyata alınacaq”.
Yeganə Bayramova
