"Vergi sahəsində aparılan islahatlar fonunda ən vacib addım sahibkarların fəaliyyətinin təmin olunması üçün yüngülləşdirici tədbirlər görülməsidir”.
Bu barədə "Sherg.az”a son vaxtlar dövlət müəssisələrində həyata keçirilən kadr və struktur dəyişikliklərinin əhəmiyyətindən danışarkən millət vəkili Fazil Mustafa danışıb.
O vurğulayıb ki, bu istiqamətdə daha optimal addımların atılmasına ehtiyac var:
"Çünki elə vəziyyət yaranıb ki, sahibkarlar, təxminən 1 il əvvəllə müqayisə etsək, eyni qaydada işləmək imkanına sahib deyillər. Böyük əksəriyyət həm də vergi ödəməyin ağırlığı ucbatından müəssisələrini bağlayıb. Vergilər Nazirliyində islahat aparılırsa, bu kimi faktların səbəbləri ortadan qaldırılmalıdır. Sahibkar öz işlətdiyi müəssisəni niyə bağlayıb? Nəticədə onlarla işçi işsiz qalır, dövlətə vergi ödəyən subyektlərin sayı azalır.
Ümid edək ki, bu hallara təsir göstərən islahatlar olacaq. Ümumilikdə götürdükdə isə, dövlət orqanlarında, idarə və təşkilatlarda kadr islahatlarının aparılması müsbət haldır. Xüsusilə, vergi sahəsində kadr islahatları gündəmdə olduğundan, bunu təqdir etməliyik. Hazırkı vəziyyətdə hamını əhatə edəcək vergi sisteminin qurulması vacibdir. Bəzən birinin yükünü başqası çəkməli olur. Amma hər kəs qanun qarşısında öz borcunu yerinə yetirməyə məcburdur”.
Aysel Aslan
