Erməni silahlı birləşmələrinin Dağlıq Qarabağda həyata keçirməyə çalışdığı diversiya zamanı verdiyi itki açıqlanıb.
Modern.az saytı Ermənistan KİV-nə istinadən xəbər verir ki, Dağlıq Qarabağdakı separatçı rejimin yaydığı məlumata görə, bu gün - fevralın 8-də saat 11.00 radələrində düşmənlə təmas xəttinin şimal istiqamətində 1979-cu il təvəllüdlü, müqavilə əsasında xidmət keçən Geqam Manukyan öldürülüb.
Bundan başqa, saat 12.00 radələrində təmas xəttinin Ağdərə istiqamətində 1988-ci il təvəllüdlü həqiqi hərbi xidmət keçən əsgər Koryun Kirakosyan da ağır yaralanıb.
Erməni tərəfi hər iki faktla bağlı araşdırma aparıldığını qeyd edib.
Azərbaycan Müdafiə Nazirliyindən Modern.az-a verilən məlumata görə, dünəndən başlayaraq erməni silahlı birləşmələri mövqelərimizi iriçaplı silahlardan atəşə tutmaqla Dağlıq Qarabağda cəbhənin başqa istiqamətində diversiya həyata keçirməyə cəhd edib. Lakin bölmələrimizin sayıqlığı nəticəsində düşmənin aktivliyi əvvəlcədən aşkar olunub. Görülən tədbirlər nəticəsində itki verən düşmən geri çəkilməyə məcbur edilib.
