"Bu ilin sonunda Federal Ehtiyatlar Sisteminin (FED) uçot dərəcəsini artırması mütləq gözlənilir”.
Bu sözləri "Sherg.az”a dolların məzənnəsinin hansı səviyyədə dəyişəcəyi ilə bağlı danışarkən iqtisadçı - ekspert Natiq Cəfərli söyləyib.
Ekspertin qənaətincə, fövqəladə hadisə baş verməsə, dekabrın ortalarında FED uçot dərəcəsini 0,25 faiz artıracaq:
"Gələn il üçünsə, 3 faiz artım nəzərdə tutulub. Yəni plan üzrə nəzərdə tutulmuş qaydada FED faiz artımlarına getsə, dolların bahalaşması müşahidə olunacaq. Bundan sonra isə neftin qiymətlərinə təzyiq yarana bilər. Çünki artıq onilliklərdir ki, "bahalı dollar=ucuz neft” formulu işləkdir. Yəni dollar möhkəmləndikcə neftin qiymətinə basqı yaranır, neft ucuzlaşır.
ABŞ və Kanada kimi ölkələrdə neft hasilatının ciddi şəkildə artmasını da nəzərə alsaq, FED-in faiz artımı da bura əlavə olunduqda neftin qiymətləri aşağı düşə bilər”.
Qeyd edək ki, ABŞ-ın nüfuzlu "Goldman Sachs" investisiya bankı ABŞ iqtisadiyyatının inamlı inkişafına əmin olduğunu və 2018-ci ildə FED-in uçot dərəcəsini 4 mərhələdə artıracağını açıqlayıb.
Aysel Aslan
