Müdafiə naziri, general-polkovnik Zakir Həsənov ölkəmizdə səfərdə olan Avropa İttifaqının Cənubi Qafqaz və Gürcüstandakı böhran üzrə xüsusi elçisi Toivo Klaar ilə görüşüb.
Nazirliyin mətbuat xidmətindən verilən məlumata görə, cəbhə xəttindəki hazırkı vəziyyətə dair məsələlərin müzakirə edildiyi görüşdə Z.Həsənov beynəlxalq birlik tərəfindən tanınan Azərbaycan ərazilərinin Ermənistanın işğalı altında olduğunu və danışıqlar prosesinin bugünədək nəticəsiz qaldığını bir daha xatırladıb. General-polkovnik cəbhə xəttində iki silahlanmış ordunun daim üz-üzə dayandığını qeyd edərək müharibənin hər an başlaya biləcəyini istisna etməyib. Nazir bildirib ki, beynəlxalq qurumlar Dağlıq Qarabağ münaqişəsinin fəsadlarının araşdırılması ilə deyil, onu yaradan səbəblərin köklü surətdə aradan qaldırılması ilə məşğul olmalı və münaqişənin bütövlükdə həllinə səy göstərməlidirlər. Klaar isə öz növbəsində Cənubi Qafqaz regionunda sabitliyin təmin olunması üçün münaqişənin tez bir zamanda sülh yolu ilə həllinin vacibliyini vurğulayıb.
Nazirin müharibə mesajını və beynəlxalq təşkilatlara çağırışını "Şərq”ə dəyərləndirən Qərb Universitetinin professoru, politoloq Fikrət Sadıqov deyib ki, müdafiə nazirinin əsas vəzifəsi münaqişəni hərbi prizmadan təhlil etməkdir.
Ekspertin sözlərinə görə, Müdafiə Nazirliyi hərbi potensialın nümayiş olunmasını, təmas xəttində toqquşmaların proqnozlaşdırılmasını və müharibə variantının önə çəkilməsini hər dəfə ortaya qoyur:
"Nazirin bəyanatı öz-özlüyündə Azərbaycanın mövqeyi ilə tam üst-üstə düşür. Əgər kimsə zənn edirsə ki, Azərbaycanı və işğalçı Ermənistanı tərəzinin eyni gözünə qoymaq, bərabərləşdirmək mümkündür, əlbəttə ki, ciddi yanılır. İstəyir Avropa Birliyinin nümayəndəsi olsun, istəyirsə də hansısa nüfuzlu ölkənin yüksək rütbəli rəsmisi, heç kim bu düşüncədə olmamalıdır. Azərbaycan tərəfi dəfələrlə öz prinsipial mövqeyini ortaya qoyub. Bəyan edib ki, heç vaxt torpaqlarımızı hərb yolu ilə azad etmək fikrindən vaz keçməmişik. Açıq şəkildə bunu deyirik.
Beynəlxalq təşkilatların nümayəndələri dərk etməlidirlər ki, cəbhə xəttində müşahidəçilərin sayının artırılması, bizə qarşı müəyyən bəyanatların verilməsi, o cümlədən Azərbaycanı sakitliyə və təmkinliyə çağırmaqla məsələ həll olunmur.
Problem ancaq beynəlxalq hüquq normaları çərçivəsində çözülə bilər. Bunun üçün də dünya gücləri Ermənistana təzyiq etməli, düşməni sülhə məcbur qoymalıdırlar. O baxımdan müdafiə naziri çox düzgün olaraq müharibə ehtimalını qabardıb və beynəlxalq təşkilatlara çağırış edib”.
İsmayıl
