"Pilotsuz uçuş aparatlarının istehsalı cəbhədə insan itkisinin qarşısını alır”.
Bunu "Sherg.az”a Azərbaycanda 6 növ yeni pilotsuz uçuş aparatlarının istehsalının əhəmiyyətindən danışarkən ehtiyatda olan polkovnik Şair Ramaldanov söyləyib.
Onun fikrincə, hansısa ərazini daha operativ öyrənmək üçün bu aparatların imkanları genişdir:
"Azərbaycan silahlı qüvvələrində PUA-ların kütləvi istifadəsi çox vacibdir. Pilotsuz aparatlar həmçinin zərbə endirmək üçün də istifadə oluna bilir. Onların imkanları ilə lazımi hədəfə zərbə endirmək olar.
Qarşımızda qoyulan tapşırıqlara, torpaqlarımızın işğalçılardan azad edilməsinə nəzər saldıqda, kifayət qədər çətinliyimizin olduğunu görərik. Dağlıq Qarabağ ərazisi relyef cəhətdən kifayət qədər çətin ərazidir. Ona görə, bu uçan aparatların imkanları kəşfiyyat təyyarələrindən, helikopterlərdən çoxdur. Düşmənin bu aparatları aşkar etmək imkanları məhduddur.
Dağlıq Qarabağda savaş üçün pilotsuz aparatların imkanları digər vasitələrə nisbətdə qat-qat zəruridir. Ölkəmizdə isə PUA-ların müasir formada istehsalına hərbi sənayedə yer ayrılır. Çünki həmin aparatlar bizə Qarabağı azad etməyimiz üçün böyük yardımçı olacaq. Artıq gözümüz düşmənin işğal etdiyi ərazilərimizdə olacaq. PUA-ların texniki imkanlarından silahlı qüvvələrin müdafiə tədbirlərində, gələcəkdə isə döyüşlərdə istifadəsi çox əhəmiyyətlidir”.
Qeyd edək ki, AMEA Yüksək Texnologiyalar Parkında çox qısa müddətdə cavan və təcrübəli komanda toplaşıb. Pilotsuz uçuş aparatlarının istehsalı prosesi sürətlə davam edir və artıq yekunlaşma mərhələsindədir. Sınaqlar müvəffəqiyyətlə həyata keçirilib. AMEA Yüksək Texnologiyalar Parkının (YTP) direktoru Vüqar Babayevin sözlərinə görə, AMEA Yüksək Texnologiyalar Parkında 6 növ yeni pilotsuz uçuş aparatı (PUA) istehsal edilir.
Aysel Aslan
