Penitensiar xidmətin əməliyyat aparatının həyata keçirdiyi əməliyyat-axtarış tədbirləri nəticəsində 11 və 16 saylı cəzaçəkmə müəssisələrinə narkotik maddə keçirilməsi cəhdlərinin qarşısı alınıb.
Xidmətdən "Sherg.az"a verilən məlumata görə, Cinayət Məcəlləsinin 317-2.1; 67.1; 177.2.2; 177.2.3; 177.2.4; 191.3.1; 29.186.2.1; 29.186.2.2 və 228.2.1-ci maddələrinə əsasən 12 il 6 ay azadlıqdan məhrum edilən və 11 saylı həbsxanada cəza çəkən məhkum, Zəkiyev Qahir Mirəli oğluna Xırdalan şəhər sakini Əhmədov Qədir Adil oğlunun gətirdiyi sovqata baxış keçirilən zaman sovqatdakı püstələrin içərisində xüsusi üsulla gizlədilmiş ümumi çəkisi 3,930 qram olan narkotik maddə - heroin aşkar edilib.
Bundan başqa, Cinayət Məcəlləsinin 234.1; 69.3; 93.1.2 və 66.5-ci maddələrinə əsasən 1 il 6 ay azadlıqdan məhrum edilən və 16 saylı cəzaçəkmə müəssisəsində cəza çəkən məhkum, İlyasov Kənan Həsən oğlu ilə qısamüddətli görüşə gələn arvadı Sumqayıt şəhər sakini İlyasova Aygün Akif qızının gətirdiyi sovqata baxış keçirilən zaman sovqatda olan plastik yemək qabındakı kotletin içərisində xüsusi üsulla gizlədilmiş bükülüdə ümumi çəkisi 1,172 qram olan narkotik maddə - heroin aşkar edilərək götürülüb.
Hər iki faktla bağlı araşdırma aparılır.
