Zirvə görüşündə Putin kifayət qədər hücumçu mövqe sərgiləyərək, Rusiyanın ambissiyalarını güzəştə hazır olmadıqlarını göstərdi
"Ötən gün beynəlxalq birlik iki nüvə dövlətinin - ABŞ və Rusiya liderlərinin görüşünə şahidlik etdi. Bu görüş dünyada ümumi təhlükəsizliyi təmin etmək və qlobal böhranları çözmək baxımından xüsusi əhəmiyyətə malik idi. Lakin təəssüflər olsun ki, Ağ Ev və Moskvanın maraqlarının kəskin toqquşduğu dünya siyasi konyukturasında sabitliyi yaxın perspektivdə təmin etmək mümkün görünmür”.
Bunu "Şərq”ə açıqlamasında Cənubi Qafqaz Təhlükəsizlik və Sülh İnstitutunun rəhbəri Məhəmməd Əsədullazadə deyib. Donald Tramp və Vladimir Putin arasında baş tutan görüşlə bağlı fikirlərini bəyan edən politoloq bildirib ki, ABŞ-ın Rusiya sərhədlərinə yaxınlaşması və Kremlin arxa bağça hesab etdiyi MDB ölkələrini təsir orbitinə salmaq siyasəti iki ölkə arasında dərinləşən böhranın əsas səbəbləridir:
"Zirvə görüşündən müsbət nəticələr əldə olunmasa da, iki fövqəldövlətin gərginləşən böhran fonunda dialoqu müsbət tendensiyadır. Lliderlərin görüşündə əsasən Suriya, İran və Ukrayna problemləri əsas müzakirə predmeti olub. Aydındır ki, tərəflər arasında siyasi və iqtisadi əlaqələrin inkişafı bu problemlərin həllindən keçir. ABŞ və Rusiya məhz Suriya məsələsində müəyyən dərəcədə koordinasiyalı fəaliyyət göstərərək, əməkdaşlıq edirlər. O baxımdan Suriya məsələsində razılaşmanın əldə olunması istisna edilməməlidir. Amma Ukrayna və İran məsələsi ziddiyyətli olaraq qalır. Rusiya Ukrayna problemində güzəştə hazır deyil və İranı da tezliklə ABŞ-a təslim etmək istəmir”.
Analitikin sözlərinə görə, zirvə görüşündə Putin kifayət qədər hücumçu mövqe sərgiləyərək, Rusiyanın ambissiyalarını güzəştə hazır olmadıqlarını göstərdi: "Görüş Tramp üçün uğursuz və Putin üçün uğurlu sayıla bilər. Baxmayaraq ki, iki ölkənin maraqlarının toqquşduğu məsələlərdə yenə də razılıq əldə olunmadı. Lakin Putinin Tramp üzərində psixoloji üstünlüyü, Ağ Ev rəhbərinin öz ölkəsindəki əleyhdarlarının əlinə ciddi kartlar vermiş oldu”.
Politoloqa görə, ümumiyyətlə, Helsinki görüşü ABŞ-a lazım deyildi:
"Yaxın Şərqdə və Ukrayna ətrafında ziddiyyətli situasiya davam edir. Ağ Ev Rusiyaya qarşı sanksiyaları genişləndirməkdədir. Belə məqamda baş tutan görüşdə sadəcə Trampın Putinə heyran olduğu təsdiq olundu və onun ikinci dönəm üçün prezidentlik arzusu suya düşdü. ABŞ-a bu qədər baş ağrısı gətirən şəxsi ikinci dəfə prezident kürsüsündə əyləşdirməzlər. Tramp Amerikanın biznes elitasının nümayəndəsi olaraq, yəhudi lobbisinin dəstəyi ilə hakimiyyətə gəlib və biznes maraqlarından çıxış edir. Məncə, Helsinki Zirvə görüşü Trampın siyasi karyerasının sonu olacaq”.
İsmayıl
